• El Gobiernu del Principáu aprobó esta selmana la Estratexa Asturiana d'Accesibilidá, qu'ameyora l'accesu, comunicación y participación de los usuarios
• La convocatoria d'ayudes individuales pa persones con diversidá funcional crez un 25 % y llega a los 387.500 euros
• Derechos Sociales destina 300.000 euros a les oficines de vida independiente, que regulen la figura del asistente personal, que va aumentar nun 50%la so prestación 
• La conseyera Melania Álvarez anuncia una partida de 300.000 euros pa llicitar la valoración d'espedientes y la creación d'un premiu de deporte inclusivu

L'aplicación de la Llei d'Acción Alcordada va suponer un aumentu de 5 millones na inversión pa discapacidá respecto al modelu anterior, basáu nel alcuerdu marco coles entidaes del tercer sector, lo que va alzar hasta los 33,3 millones la partida pa recursos d'agospiamientu y centros de sofitu a la integración nel 2022. Asina lo anunció güei la conseyera de Derechos Sociales y Bienestar, Melania Álvarez, nel actu celebráu con  motivu del Día Internacional  de la Discapacidá,  onde se presentó la Estratexa Asturiana d'Accesibilidá 2020-2022, que va ameyorar l'accesu, la comunicación y participación de toles persones, especialmente d'aquelles con diversidá funcional.

El compromisu de la conseyería coles persones con dalgún tipu de discapacidá refléxase tamién na xubida al respective d’esti añu

 anguaño d'un  25% na convocatoria d'ayudes individuales a esti colectivu, qu'algama los 387.500 euros. Tamién s'aprobaron 300.000 euros pa les oficines d’apoyu independiente, que van regular la figura del asistente personal. “Una figura fundamental pa promover la vida independiente y evitar la institucionalización d'estes persones. Tres un procesu de participación y trabayu de mancomún coles entidaes más

representatives del ámbitu de la discapacidá, vamos modificar la normativa actual coles mires de fomentar el so usu, por aciu una meyor definición de los sos requisitos y la medra del 50% del importe de les ayudes esistentes”, esplicó la conseyera.

Melania Álvarez tamién anunció una partida pa 2022 de 300.000 euros pa llicitar la valoración de los espedientes de discapacidá y allixerar les llistes d'espera, y el caltenimientu de 918.601 euros pa les subvenciones nominatives a les entidaes de discapacidá. Amás, la conseyería va crear un premiu de deporte inclusivu con un presupuestu de 6.000 euros.

Meyora de la comunicación

Al respective de la Estratexa Asturiana d'Accesibilidá, aprobada esta selmana pol Conseyu de Gobiernu y que se va llevar a cabu de forma pilotu na conseyería, va sirvir p’ameyorar la interacción con tolos usuarios por mediu de sistemes alternativos de comunicación como alfabetos manuales o dactilolóxicos, bucles magnéticos que dexen que'l soníu seya captáu por audífonos, y llibretes qu'usen pictogrames, semeyes ya imáxenes. Asina mesmo, va presentase un documentu que recueye les característiques qu’han  siguir los edificios de l'Alministración p'ameyorar  les caracteristicas d'accesibilidá universal.

Álvarez destacó que dende'l so departamentu vien trabayándose de forma comprometida “pa esaniciar toles barreres que puedan atopase les persones, yá seyan de comunicación, d'accesu a una vivienda o a un autobús, o d'orientación. “El nuesu oxetivu ye favorecer la inclusión social y promocionar la vida independiente, d'ende qu'agora aprobemos esta estratexa que va sirvir de fueya ruta en tola Alministración”, dixo.

La Estratexa Asturiana d'Accesibilidá permite un cambéu nel ámbitu d'atención al ciudadanu que va ufiertar distintos sistemes de comunicación y accesos p'adaptase a les persones según les sos caracteristiques específiques nos espacios públicos urbanizaos, edificaciones, viviendes, tresporte, comunicación y señalización, amás de nel ámbitu de la cultura, el turismu y el deporte. Otres de les dos exes estratéxiques sobre los que pivota son la sensibilización y la formación de calidá.

La estratexa vieno trabayándose de forma conxunta al traviés de distintes meses nes que participaron técnicos de l'Alministración del Principáu, colexos profesionales, la Universidá d'Uviéu, corpotraciones locales, conceyos y representantes de les entidaes del colectivu de persones con discapacidá y mayores, amás d'asociaciones de vecinos.  

​​​​​​​