​​​​​​​

• La conseyera de Derechos Sociales anuncia en Candás que l’añu que vien va habilitase un tercer pisu nel centru d’atención a la dependencia.
• Melania Álvarez: “Al traviés del Mecanismu de Recuperación y Resiliciencia, nel 2022 vamos ampliar con 1,3 millones el Centru de La Arboleya de Meres”.

La Conseyería de Derechos Sociales y Bienestar aumenta nun 13,7 % el presupuestu de la Fundación Asturiana d’Atención y Protección a Persones con Discapacidaes y/o Dependencies (Fasad), lo que va dexar habilitar en La Madalena (Avilés) un recursu d’estancia temporal como sofitu a les families.

La conseyera de Derechos Sociales y Bienestar, Melania Álvarez, facilitó estos datos na visita que realizó güei al Centru d’Atención a la Dependencia de Candás por cuenta de la celebración de los actos del Día Internacional de la Discapacidá. Fasad y el Conceyu de Carreño xestionen esti recursu con un conveniu de collaboración que yá s’anovó. El centru, que la so titularidá correspuende a la conseyería, engloba al tiempu otros dos equipamientos: los centros de día de persones mayores y el d’apoyu a la integración (CAI), onde se va abrir una tercer planta l’añu que vien que va dar serviciu a dambos recursos.

“Vamos reforzar les actividaes al aire llibre que son les que más disfruten les persones usuaries y que se vieron afectaes poles restricciones de la pandemia”, avanzó la conseyera. Concretamente, van ampliase les iniciatives nel polideportivu, les visites a museos, al cine, al telecentru y l’usu de la piscina. Esti centru empezó a funcionar nel 2010 y dispón de 22 places de día y 23 nel CAI.

Nel centru de día desenvuélvense programes d’alimentación y nutrición, aséu y hixene y de prevención de cayíes, amás d’otros d’intervención terapéutica y coles families.

El CAI, pela so parte, ye un recursu especializáu d’atención y formación pa persones adultes con discapacidá onde se promocionen la integración sociollaboral, el desenvolvimientu personal y la independencia cola ellaboración de planes personalizaos de sofitu. “Ye importante camudar la visión y danos cuenta de que tenemos que lluchar p’acabar colos entornos discapacitantes y de que toles persones tienen capacidaes, anque non siempre seyan iguales”, aseguró la conseyera.

Álvarez tamién anunció que, al traviés del Mecanismu de Recuperación y Resiliencia, nel 2022 va ampliase con 1,3 millones el Centru de La Arboleya de Meres.