• Na última convocatoria, que ta n’execución, aprobáronse 631 proyectos: 429 d’empreses privaes, 42 d’entidaes locales y 60 d’organizaciones ensin ánimu d’arriquecimientu

Les subvenciones, cofinanciaes al traviés del fondu européu Feader, fomenten la competitividá, impulsen un desenvolvimientu territorial equilibráu y creen empléu

El Principáu moviliza cuasi 44 millones nel mediu rural al traviés de les ayudes del programa Leader. Anguaño ta n’execución la última convocatoria y el Conseyu de Gobiernu yá aprobó, n’antemanáu de gastu, la correspondiente al 2022.

Les subvenciones del proyectu Leader van dirixíes a les persones qu’opten por entamar: empresaries y empresarios, entidaes locales y organizaciones ensin ánimu d’arriquecimientu, que desenvuelven proyectos nel mediu rural.

Na última convocatoria, anguaño n’execución, aprobáronse 631 proyectos, a los que se destinaron 22.684.304 euros. Del total d’iniciatives, 429 correspuenden a empreses privaes, 142 a entidaes locales y 60 a asociaciones ensin ánimu d’arriquecimientu.

La Conseyería de Mediu Rural y Cohesión Territorial establez convenios colos once grupos d’acción local, que cubren tol territoriu asturianu, pa xestionar estes ayudes. Ente les xeres d’estos grupos figuren la difusión, el sofitu, l’asesoramientu, l’impulsu y la collaboración con quien entamen nel mediu rural. Tamién s’encarguen d’informar sobre les ayudes y de la so tramitación. Pa sufragar los gastos de funcionamientu d’estos grupos, el Conseyu de Gobiernu autorizó’l mes pasáu un gastu de 4.423.475 euros que va dexar formalizar la segunda adenda al conveniu de collaboración.

Otra manera, cola mira de qu’entaíne la tramitación de la convocatoria 2022 del programa Leader, l’Executivu aprobó yá un gastu antemanáu de 16,5 millones. De la partida total, 13 millones son pa empreses privaes, 3 pa entidaes locales y 500.000 euros p’asociaciones ensin ánimu d’arriquecimientu.

El presupuestu destináu a les ayudes pal añu que vien consolida l’aumentu del 40 % que yá hubo nesti exerciciu na cantidá de l’ayuda p’autónomos, el conocíu como tique rural, fixada en 35.000 euros. 

Les ayudes del programa Leader tán cofinanciaes pola Unión Europea al traviés del Fondu Européu de Desenvolvimientu Rural (Feader). El so oxetivu ye ayudar a fomentar la competitividá de l’agricultura, garantizar la xestión sostenible de los recursos naturales y l’acción pol clima y llograr un desenvolvimientu territorial equilibráu. Tamién valen pa crear riqueza y empléu nel mediu rural.