• El proyectu va beneficiar a un centenar d’habitantes y va executase en 18 meses

 
La Conseyería d’Alministración Autonómica, Mediu Ambiente y Cambéu Climáticu empezó les obres de saniamientu d’Argañosa, Reconco y La Peral, nel conceyu d’Illas, nes que va invertir 568.110 euros. L’actuación, que tien un plazu d’execución de 18 meses, va beneficiar a un centenar d’habitantes de la zona.
 
El proyectu consiste na execución de les obres necesaries pa recoyer l’agua residual d’estes trés poblaciones y tresportales a la rede de colectores de Calavero, que cunta con una estación depuradora. Esta intervención incluye la creación d’una rede formada por trés colectores xenerales que conecten con otros secundarios pa encauzar los vertíos de les viviendes cercanes a les sos traces.
 
Nel casu d’Argañosa, el colector principal va tener 1.154 metros de tubería y 27 pozos de rexistru. La obra incorpora tamién cinco colectores secundarios con 20 pozos de rexistru y 22 acometíes domiciliaries.
 
En Reconco, la tubería va sumar 946 metros de llargor y van executase 26 pozos de rexistru. Amás, va tener un colector secundariu, 4 pozos de rexistru y 7 acometíes.
 
Pela so parte, les obres en La Peral van dexar recoyer l’agua de les viviendes asitiaes na parte noroeste del llugar, porque les demás tienen la so propia rede de saniamientu, que comunica col sistema xeneral del conceyu en La Caizuela. El llargor de la tubería va ser de 875 metros y van construyise 20 pozos de rexistru. La rede va cuntar, amás, con dos colectores secundarios, 7 pozos de rexistru y otres tantes acometíes domiciliaries.
 
Les obres, que cunten con financiamientu del Fondu Européu de Desenvolvimientu Rexonal (Feder), van concluyir cola pavimentación de viales y la reposición de los servicios y terrenos afectaos.​​​​​​