• Casi trés de cada cuatro dosis alministráronse a mayores de 65 años, un grupu nel que yá recibieron la profilaxis 183.216 ciudadanos
• Les árees sanitaries citen a la población de riesgu pa la que ta indicada esta midida nun procesu de captación proactiva

El Serviciu de Salú del Principáu (Sespa) vacunó a 253.437 persones contra'l gripe nes cinco primeres selmanes de la campaña, 22.984 más que nel mesmu periodu del añu pasáu, cuando se inmunizaron 230.453. Estes cifres reflexen un aumentu del 10%.

Per grupos de población, casi trés de cada cuatro dosis alministráronse a mayores de 65 años, un grupu nel que yá recibieron la profilaxis 183.216 persones.

Tocantes a la franxa d'edá de 15 a 64 años, protexóse a 64.475 persones, ente elles, 2.095 muyeres embarazaes. Tamién s'aplicó la dosis correspondiente a 5.746 menores n'edá pediátrica.

El Sespa empecipió la campaña d'inmunización el 2 de payares. Per segundu añu consecutivu, les árees sanitaries encargáronse de citar a los colectivos más vulnerables énte esti virus respiratoriu, siguiendo un procesu de captación proactiva.

La vacuna del gripe ta indicada pa mayores de 65 años, persones inmunodeprimidas, con enfermedaes cróniques o obesidá, muyeres embarazaes que presenten más riesgu d'entueyos y pacientes con hipertensión arterial. Tamién s'aconseya pa quien conviven con persones d'altu riesgu, personal de centros sanitarios y sociales, estudiantes en práctiques de Ciencies de la Salú y trabayadores de servicios públicos esenciales (policías, bomberos, protección civil, etc).

Nesti sentíu, les autoridaes sanitaries sorrayen la importancia de que'l personal sanitariu y sociosanitariu se vacune pa prevenir andaes a pacientes y usuarios de centros residenciales de mayores.

Amás, la profilaxis ta encamentada pa menores de 6 meses a 2 años nacíos con menos de 32 selmanes de xestación.

Midíes hixéniques

La Dirección Xeneral de Salú Pública recuerda que la vacunación antigripal añal ye la meyor estratexa pa la prevención del gripe y los sos entueyos. Amás, encamienta delles midíes hixéniques col fin d'evitar la tresmisión del virus:

• Tapase la boca y la ñariz con un pañuelu de papel, usar la cara interna del coldu al espirriar o tusir, y refugar el pañuelu recién usáu.
• Utilizar mázcaru énte síntomes compatibles col gripe, especialmente nes relaciones con persones vulnerables.
• Llavar les manes con frecuencia, especialmente en sonándose o espirriar, al dir al aséu y antes d'inxerir alimentos.
• Nun compartir vasos, cubiertos, toallas y otros oxetos que pudieren tar en contactu con cuspia y secreciones respiratories.​