• El conseyeru Pablo Fernández presentó güei les cuentes pa 2022, que crecen 45 millones al respective de esti exerciciu.
• El Sespa aborda la mayor inversión de los últimos años, con 27,5 millones y una medraa del 81,92% pa desenvolver la ciruxía robótica, les terapies CAR-T contra'l cáncer y el portal del paciente.
• Los profesionales de la rede de primaria atropen el 25% de la partida pa personal.

El conseyeru de Salú, Pablo Fernández Muñiz, presentó güei na Escuela d'Enfermería de Xixón el presupuestu del so departamentu pa 2022, que xube a 1.998.356.567 euros, un 2,34% más qu'anguaño (+ 45.658.291 euros), pa impulsar l'atención primaria, los sistemes d'información y la tecnoloxía de vanguardia.

El Principáu vuelve incrementar la inversión en salú por habitante, hasta algamar los 1.975,5 euros, una de les más altes del país y 58,5 euros superior a la d'esti exerciciu.

El Serviciu de Salú (Sespa) va xestionar 1.958,7 millones, una cifra que va permitir atender la demanda asistencial y caltener una respuesta afayadiza énte la pandemia del coronavirus.

27,5 millones pa tecnoloxía

El Sespa va abordar la mayor inversión de los últimos años, con 27,5 millones financiaos na so mayor parte con fondos europeos, lo que representa una medra del 81,92% en comparanza col presupuestu actual. Esta partida va permitir desenvolver el portal del paciente, la historia embarcada de les UVI móviles y atención en casa, la renovación y modernización de los equipamientos d'endoscopia dixestiva, la dixitalización de toles sales de rayos, l'alquisición de dos equipos de ciruxía robotizada pal Hospital Universitariu Central d'Asturies (HUCA) y pal Hospital Universitariu de Cabueñes, la compra de ecógrafos p'atención primaria y l'equipamientu pa implantar les terapies de CART-T contra'l cáncer.

Amás, dientro del Plan Inveat pa la compra y renovación d'equipos d'alta tecnoloxía, van adquirise 7 TAC, 5 resonancies magnétiques, 2 anxiógrafos, y un PET-TAC, de la que se va habilitar una sala de hemodinámica.

Atención primaria

La rede d'atención primaria ye una de les prioridaes pa 2022. Asina, les cuentes recueyen pa esti nivel asistencial una cuantía de 322 millones, 30 más qu'anguaño, con una xubida del 12,5%. Amás, el Sespa va destinar el 25% del so presupuestu de personal a los profesionales de los centros de salú.

El Serviciu de Salú cuenta con una partida de 35,6 millones pa la dotación de 170 facultativos y 213 enfermeres -tanto d'atención primaria, como de salú mental y d'asistencia hospitalaria- y 70 auxiliares alministrativos pa primaria.

En total, el Sespa va dedicar el 47,96% del so presupuestu a personal, lo que supón 938 millones. D'esa cuantía, 13 van destinase a les nueves convocatories de carrera y desenvolvimientu profesional y otros 2 al Decretu d'Atención Primaria, la exención de guardias de profesionales de más de 55 años y los módulos de tarde de primaria y del Samu. Coles mesmes, va potenciase a los especialistes en formación (MIR y EIR), con una partida de 40 millones (5,4 más qu'anguaño).

Per otra parte, asígnense 5 millones a los programes especiales del plan de choque de llista d'espera y 3,2 a refuerzos de personal pa l'atención covid: rastreadores, técnicos de llaboratoriu y asistencia en puntos autocovid y de vacunación.

Gastu farmacéuticu

El Sespa destina 613 millones a gastos corrientes, de los que 208 correspuenden a l'alquisición de fármacos y 13,8 a la compra de vacunes. Nesta partida inclúyense tamién el tresporte sanitariu (26,6 millones) y les derivaciones a la rede hospitalaria alcordada y privada (86 millones), incluyíes les intervenciones del plan de choque p'atayar les llistes d'espera.

Coles mesmes, acútense 312 millones a la receta electrónica d'atención primaria y hospitalaria, especialmente pa melecines rellacionaes con patoloxíes cróniques (diabetes, víes respiratories, psicolépticos, antitrombóticos y antilipídicos).

Sistemes d'información

Salú va triplicar en 2022 la inversión pal desenvolvimientu de los sistemes d'información, hasta algamar los 985.008 euros, colos que se van abordar proyectos venceyaos a la intelixencia artificial que van ayudar a la toma de decisiones clíniques, de xestión ya investigación, y van facilitar la docencia.

Coles mesmes, va implantase un sistema informáticu de llaboratoriu únicu pa tol Sespa y va desenvolvese una plataforma d'integración de sistemes d'información sanitaria. Nesti ámbitu, siguirá avanzándose na teleasistencia, la estación clínica d'atención primaria, el sistema d'información de Vixilancia Epidemiolóxica y la interoperabilidá y accesibilidá de la documentación clínica pa usuarios.

Inversiones n'equipamientos sanitarios

La conseyería va destinar 22.900.010 euros, 6,3 millones más qu'esti añu, a obres n'equipamientos sanitarios. Más de la metá de la partida, 12.278.000 euros, van permitir abordar la primer fase de les obres d'ampliación y reforma del Hospital Universitariu de Cabueñes.

Coles mesmes, contémplase l'entamu de los trabayos de construcción de los nuevos centros de salú de Sotrondio (Samartín del Rei Aurelio), Nuevu Roces (Xixón) y La Pola L.lena, según la redacción del proyectu del centru de Tapia de Casariego, ente otres intervenciones n'hospitales comarcales como Xarrio y el Valle del Nalón.

Salú Pública

El Principáu va dedicar 3.750.100 euros a intervenciones de prevención, promoción de la salú y salú comunitaria, que se van materializar en programes nes escueles, iniciatives pa la prevención de situaciones de riesgu y l'amenorgamientu del consumu d'alcohol, tabacu y sicofármacos; la promoción d'estilos de vida saludables y los proyectos d'acción comunitaria en conceyos.