• La conseyería saca 46 places de Primaria y otres 23 d'orientación a media xornada que van incorporase a los sos puestos el 10 de xineru.
• Los proyectos van poder incluyir actividaes de branu que s'estiendan más allá del calendariu escolar.

La Conseyería d'Educación va convocar 69 places de refuerzu a media xornada destinaes a los centros públicos escoyíos pal programa PROA+, que quier llograr l'éxitu escolar de tol alumnáu, con especial atención nel que ta en situación de vulnerabilidá. Trátase de 46 puestos de Primaria y otros 23 d'orientación que van publicase na convocatoria del 21 d'avientu. La so incorporación a los colexos y institutos ta prevista pal 10 de xineru, al empiezu del segundu trimestre.

La conseyería va entamar acciones formatives y d'asesoramientu al traviés de la rede de centros del profesoráu (CPR).

El director xeneral d'Ordenación, Evaluación y Equidá Educativa, David Artime, treslladó esta información a les direcciones de los centros escoyíos nuna xunta telemática. Amás, aprovechó l'alcuentru pa da-yos la bienvenida y informar sobre les acciones que van poder desenvolvese dientro del programa mientres el periodu de vixencia del plan (2021-2024).

La conseyería adelantó-yos que nos díes próximos los centros van recibir una tresferencia económica que-yos va dexar encarar los gastos vinculaos al PROA+.

Educación escoyó centros d'Infantil, Primaria y Secundaria que cunten, pelo menos, con un 30 % d'alumnáu vulnerable, asina como centros rurales o allugaos en zones con gran dispersión de población. Nel casu de los públicos, utilizóse l'índiz socioeconómicu como criteriu d'ordenación pa ellaborar la llista definitiva de beneficiarios.

Los centros han cuntar, a lo menos, cola implicación espresa del 60 % del claustru de profesoráu, desenvolver un plan estratéxicu de tresformamientu y concretar les actividaes curso a cursu, hasta'l 2023-2024. Amás, van tener que designar a una persona pa la coordinación del programa y realizar la correspondiente xustificación técnica y económica del importe asignáu pa la so execución. Van poder entamase inclusive actividaes de branu fuera del calendariu lectivu.

La conseyería tamién escoyó pa esta convocatoria del PROA+ a 10 colexos de la rede concertada qu’han tener que desenvolver les sos actividaes nel mesmu periodu que los públicos.