• La estación que mide la calidá na zona norte de la capital detectó valores altos de partícules nos últimos trés díes
• Esta midida implica’l siguimientu de la evolución, l’impulsu d’acciones informatives dirixíes a la ciudadanía, les empreses y otres alministraciones, y la prohibición de quemes vexetales

La Conseyería d’Alministración Autonómica, Mediu Ambiente y Cambéu Climáticu activó n’Uviéu’l protocolu d’actuación por episodios de contaminación del aire nel so nivel preventivu, al persistir trés díes siguíos niveles altos de partícules en suspensión na atmósfera y condiciones desfavorables de ventilación.

El dispositivu actívase nel so nivel 0 cuando la concentración de partícules na atmósfera ye de más de 25 microgramos por metru cúbicu (µg/m3) de PM 2,5 (partícules de diámetru inferior a 2,5 micres) o de 45 µg/m3 pa les PM 10 (diámetru inferior a 10 micres) a lo llargo de trés díes en polo menos una estación de la zona y, simultáneamente, existe previsión de fenómenos meteorolóxicos qu’estorben l’espardimientu de contaminantes na atmósfera (estabilidá atmosférica, inversión térmica y ausencia d’agua). Según les previsiones de l’Axencia Estatal de Meteoroloxía (Aemet), tanto güei como mañana la ventilación nel área Uviéu va ser desfavorable. Polo tanto, danse les condiciones p’activar el protocolu.

La estación de la rede de control allugada nos alredores del Palaciu de los Deportes d’Uviéu foi la que detectó valores percima de los niveles mínimos previstos pa les partícules PM 2,5 y PM 10. En concreto, los rexistros de dambos contaminantes son estos:

Les demás estaciones que monitoricen la calidá del aire n’Asturies nun presenten simultáneamente valores de concentración de partícules en suspensión y condiciones desfavorables de ventilación qu’esixan l’activación del protocolu.

Midíes

El nivel 0 preventivu del protocolu implica’l siguimientu de la evolución y l’adopción de midíes informatives empobinaes a la ciudadanía, les empreses de la zona y otres alministraciones. A pesar de que nesta fase nun s’establecen restricciones de tráficu, sí aconseya l’usu del tresporte públicu y l’usu compartíu del vehículu priváu. Amás, prohíbense les quemes de restos vexetales.

Los conceyos afectaos puen adoptar les midíes que consideren afayadices p’amenorgar la contaminación, como’l riegu de viales y carreteres. Tamién se va reforzar la inspección ambiental a les empreses del área afectada.

Nel casu de persones sensibles sobre manera (adultos o neños con problemes respiratorios, patoloxíes cardiaques, EPOC, etc; muyeres embarazaes y lactantes) aconséyase planificar l’actividá física y menguala si esperimenten síntomes, amás d’apartase de les víes con más tráficu.

Niveles del protocolu y activaciones anteriores

El protocolu de contaminación regula trés contaminantes: partícules PM 2,5, partícules PM 10 y dióxidu de nitróxenu (NON2).

Amás, propón trés niveles: 0 (preventivu), 1 (avisu) y 2 (alerta), a tenor de de la superación de los siguientes niveles mínimos.

La superación d’estos niveles mínimos tien que dir acompañada, de manera simultánea, de la previsión de fenómenos meteorolóxicos qu’estorben l’espardimientu de los contaminantes na atmósfera.

El Conseyu de Gobiernu aprobó n’agostu del 2018 les normes d’actuación énte episodios de contaminación del aire. Dende entós, nel área d’Uviéu activáronse nestes ocasiones: 

• 17 de payares del 2018 (nivel 0, 2 díes).
• 24 d’avientu del 2018 (nivel 0, 10 díes).
• 7 de xineru del 2019 (nivel 0, 3 díes).
• 24 de febreru del 2019 (nivel 1, 6 díes).
• 30 d’avientu del 2019 (nivel 0, 3 díes / nivel 1, 2 díes).​​​​​​​​