• La estación del Palaciu de los Deportes de la capital sigue rexistrando valores elevaos de partícules en suspensión y persisten les condiciones de ventilación desfavorables.

La Conseyería d'Alministración Autonómica, Mediu Ambiente y Cambéu Climáticu caltién per segundu día consecutivu'l protocolu por episodios de contaminación nel so nivel preventivu na zona d'Uviéu, al persistir niveles altos de partícules en suspensión na atmósfera y condiciones desfavorables de ventilación.

El dispositivu actívase nel so nivel 0 cuando la concentración de partícules na atmósfera ye más de 25 microgramos por metro cúbicu (µg/m3) de PM2,5 (partícules de diámetru inferior a 2,5 micres) o de 45 µg/m3 pa les PM10 (con diámetru inferior a 10 micres), mientres trés díes, en polo menos una estación de la zona y simultáneamente existe previsión de fenómenos meteorolóxicos qu'estorben l'espardimientu de contaminantes na atmósfera (estabilidá atmosférica, inversión térmica y ausencia d'agua).

Según les previsiones de l'Axencia Estatal de Meteoroloxía (Aemet), la ventilación nel área d'Uviéu va ser desfavorable a lo llargo del día de güei, polo que se dan les condiciones pa caltener l'alerta.

L’aglomeración del área d'Uviéu incluye, amás d'esti conceyu, los de Noreña, Siero, La Ribera y Llanera, asina como la zona industrial de Morcín.

Los valores d'estos contaminantes rexistraos nos trés díes últimos na estación del Palaciu de los Deportes d'Uviéu son los siguientes:

El restu d'estaciones de la rede de control de calidá del aire del Principáu nun presenten simultáneamente valores de concentración de partícules en suspensión y condiciones desfavorables de ventilación qu'esixan l'activación del protocolu.

La Conseyería de Mediu Ambiente yá notificó ayeri l'activación del protocolu a los representantes de les alministraciones afectaes, al traviés de los miembros de la comisión de valoración y siguimientu del mesmu.

Asina mesmo, comunicóse l'activación del protocolu a los servicios competentes en materia de salú pública y atención sanitaria.

Nel casu de persones sensibles sobre manera (adultos o neños con problemes respiratorios, patoloxíes cardiaques, EPOC, etc; muyeres embarazaes y lactantes) aconséyase planificar l’actividá física y menguala si esperimenten síntomes, amás d’apartase de les víes con más tráficu.