Categories Navigation
Categories Navigation
El Principáu caltién el protocolu por contaminación atmosférica por quintu día al persistir los niveles de partícules na zona d'Uviéu
- La estación del Palaciu de los Deportes sigue rexistrando valores elevaos de PM 2,5 y PM 10
La Conseyería d'Alministración Autonómica, Mediu Ambiente y Cambéu Climáticu caltién activu por quintu día consecutivu'l protocolu por episodios de contaminación atmosférica nel so nivel preventivu na zona d'Uviéu, al persistir una concentración elevada de partícules en suspensión.
El dispositivu actívase nel so nivel 0 cuando la concentración de partícules na atmósfera ye superior a 25 microgramos por metru cúbicu (µg/m3) de PM 2,5 (partícules de diámetru inferior a 2,5 micres) o de 45 µg/m3 pa les PM 10 (con diámetru inferior a 10 micres), mientres trés díes, en pelo menos una estación de la zona y simultáneamente existe previsión de fenómenos meteorolóxicos qu'enzanquen l'espardimientu de contaminantes na atmósfera (estabilidá atmosférica, inversión térmica y ausencia d'agua).
La conseyería decidió caltener el protocolu mientres 24 hores más por precuru, a pesar de que les previsiones de l'Axencia Estatal de Meteoroloxía (Aemet) apunten a que la ventilación nel área d'Uviéu va ser favorable a lo llargo del día, polo que se daríen les condiciones pa desactivalu. Pal allongamientu del protocolu túvose en cuenta que nes xornaes previes rexistráronse valores elevaos y prevése que güei sían asemeyaes. L’aglomeración del área d'Uviéu incluye, amás d'esti conceyu, los de Noreña, Siero, La Ribera, Llanera y la zona industrial de Morcín.
Los valores d'estos contaminantes rexistraos nos trés díes últimos na estación del Palaciu de los Deportes d'Uviéu son estos:
| 17/12/21 | 18/12/21 | 19/12/21 | |
| Media diaria PM2,5 (µg/m3) | 33 | 33 | 36 |
| Media diaria PM10 (µg/m3) | 50 | 50 | 53 |
El restu d'estaciones de la rede de control de calidá del aire del Principáu nun presenten simultáneamente valores de concentración de partícules en suspensión y condiciones desfavorables de ventilación qu'esixan l'activación del protocolu.
La Conseyería de Mediu Ambiente notificó’l xueves de la selmana pasada l'activación del protocolu a los representantes de les alministraciones afectaes, al traviés de los miembros de la comisión de valoración y siguimientu del mesmu.
Asina mesmo, comunicóse l'activación del protocolu a los servicios competentes en materia de salú pública y atención sanitaria.
Nel casu de persones especialmente sensibles (adultos o neños con problemes respiratorios, patoloxíes cardiaques, EPOC, y muyeres embarazaes y lactantes) encamiéntase planiar l'actividá física y amenorgala si esperimenten síntomes. Tamién se-yos aconseya apartase de les víes con más tráficu.