• Van asistir axentes d'Avilés, Cangas, Castrillón, Corvera, El Franco, Xixón, Grandas, Llangréu, Mieres, Nava, Noreña, Siero, Tapia y A Veiga
• La presidenta de la Comisión de Derechos Humanos del Colexu d'Abogaos de Málaga, Charo Alises, va ser la encargada d'impartir les clases

Un total de 37 policías locales de 14 conceyos van participar mañana n'Uviéu na primer xornada formativa entamada pola Conseyería de Presidencia sobre los delitos d'odiu y la prevención de la LGTBIfobia. En concreto, inscribiéronse axentes d'Avilés, Cangas, Castrillón, Corvera, El Franco, Xixón, Grandas, Llangréu, Mieres, Nava, Noreña, Siero, Tapia y A Veiga.

La Dirección Xeneral de Mocedá, Diversidá Sexual y Derechos LGTBI impulsa esta acción de formación, con un programa qu'incluye l'análisis de los delitos d'odiu, la esposición de distintos conceptos y mitos sobre la diversidá sexual, la violencia intraxéneru y l'atención a les víctimes de delitos d'odiu LGTBI. Amás, va proyectase un documental sobre la llucha d'esti colectivu.

La presidenta de la Comisión de Derechos Humanos y coordinadora del Serviciu d'Atención Xurídica Gratuita a Víctimes de Delitos d'Odiu del Colexu d'Abogaos de Málaga, Charo Alises, va ser la encargada d'impartir les clases. Alises tamién ye autora del trabayu Bullying homofóbico. Guía de actuación, editáu pol Conceyu de Marbella, y de la Guía de delitos de odio LGTBI, de la Conseyería d'Igualdá y Polítiques Sociales de la Xunta d'Andalucía.

La directora xeneral de Mocedá, Diversidá Sexual y Derechos LGTBI, Clara Sierra, va presentar la xornada, que va empezar a les 09:30 hores nel salón d'actos de la Conseyería de Facienda.