• Les ayudes del Idepa sofiten proyectos anovadores nel ámbitu de la industria 4.0 y promueven meyores en procesos, productos y modelos de negociu
• Les compañíes, que van invertir 5 millones, comprométense al caltenimientu de 1.703 empleos

El Gobiernu d'Asturies concedió 1,5 millones en subvenciones que van dexar desenvolver 62 proyectos empresariales y van movilizar una inversión global de 5 millones. Pela so parte, les compañíes beneficiaries comprometiéronse a caltener 1.703 empleos, 969 más que na convocatoria anterior. Con estes ayudes, el Principáu quier impulsar la competitividá de les empreses rellacionaes cola industria 4.0 n’ámbitu de los procesos, el productu y el modelu de negociu.

Les subvenciones formen parte de la convocatoria de sofitu al tresformamientu dixital que xestiona l'Institutu de Desenvolvimientu Económicu del Principáu d'Asturies (Idepa). Mediante esta llinia, les empreses puen incorporar soluciones anovadores vinculaes a la dixitalización de procesos productivos, la instalación de software pa la xestión intelixente d'infraestructures o la integración de sistemes de guiáu en 3D. Tamién se facilita l'aplicación de la sensórica pa la captación y procesamientu de datos, de cara a ameyorar la xestión y el control de les compañíes.

En total, presentáronse a la convocatoria 98 proyectos, de los cualos aprobáronse 62, 24 más que l'añu pasáu. Tamién aumentó la subvención concedida, hasta llegar a los 1,5 millones, lo que supón 500.000 euros más que l'exerciciu anterior.

Nel periodu 2019-2021 beneficiáronse de les ayudes al tresformamientu dixital 131 empreses, con una inversión presentada de 10,3 millones. Los fondos concedíos sumen 3,4 millones y el compromisu de caltenimientu del empléu beneficia a 3.360 persones.​​​​