• La Conseyería de Ciencia, al traviés del Idepa, concede ayudes pa la creación de 16 firmes innovadores y l'afitamientu d'otros dos proyectos empresariales
• Nos trés años últimos sofitáronse 48 propuestes empobinaes a treslladar al mercáu resultaos d'investigación

El Gobiernu d'Asturies impulsa la creación d’empreses nueves de base tecnolóxica (EBT) y el desenvolvimientu de compañíes yá implantaes con 1,4 millones n'ayudes. Un total de 18 proyectos, dos más que l’añu pasáu, llograron una ayuda de la Conseyería de Ciencia, Innovación y Universidá, al traviés del Institutu de Desenvolvimientu Económicu del Principáu (Idepa).

Les propuestes que llograron financiamientu van movilizar una inversión total de 2,1 millones y van suponer la creación de 16 firmes tecnolóxiques nueves y l'afitamientu d'otros dos. La subvención del Principáu incrementóse en 200.000 euros al respective del añu pasáu.

Los proyectos aprobaos, que la so resolución va publicase d’equí a poco nel Boletín Oficial del Principáu d’Asturies (BOPA), tán rellacionaos cola temática y los campos de la Estratexa d'Especialización Intelixente: materiales avanzaos y sostenibles, modelos nuevos de producción, suministros y tecnoloxíes pa redes, y avieyamientu demográficu y calidá de vida.

Los costos subvencionables céntrense en personal técnico, materiales, collaboraciones esternes, adquisición de patentes o investigadores esternos; asina como los gastos de constitución o funcionamientu de la empresa, na primer fase, y les actividaes de divulgación y comercialización, na segunda.

Ente 2019 y 2021, nel marcu d'esta convocatoria, sofitáronse 48 iniciatives innovadores con una subvención de 3,3 millones y una inversión global de 5,3 millones.

Les ayudes, dirixíes a pequeñes empreses innovadores, pretenden favorecer el desenvolvimientu d'un tipu d'empreses que la so actividá céntrase na esplotación de productos o servicios que riquen l'usu de tecnoloxíes o conocencies desenvueltes a partir de l'actividá investigadora. Son, por tanto, compañíes bien innovadores, dinámiques y que se desendolquen n'actividaes non tradicionales.