• Les actividaes pal 2022 céntrense nes esposiciones, nes residencies y el programa educativu
• Tres el fin del plazu de presentación de solicitúes, l'equipamientu encara la fase de selección p’anovar el puestu de dirección-xerencia 

El patronatu de la Fundación La Llaboral, Centru d'Arte, Creación Industrial y Promoción Cultural aprobó güei’l plan d'actuación del centru d'arte pal 2022. Amás, informóse al órganu del procesu de renovación del puestu de la dirección-xerencia del equipamientu, pal que güei concluye'l plazu de presentación de solicitúes.
 
El centru cultural diseñó un programa d'actividaes estructuráu en cuatro grandes bloques:

• Esposiciones. Les distintes muestres van desenvolvese dende febreru hasta final d'añu, y van tar vinculaes a los proyectos europeos nos que ta presente'l centru cultural, mesmo qu’a l'actividá de los residentes na institución y a la del Premiu «LABJoven_Experimenta», el programa d’apoyu a creadores asturianos.
• Residencies. Llaboral Centru d'Arte va llanzar dos convocatories del programa de creadores asturianos en residencia nel equipamientu. L'oxetivu d'estes iniciatives ye, per un llau, que Llaboral sirva d’apoyu p’artistes que s'atopen n'Asturies y, por otru, dar a conocer los recursos y posibilidaes del centru. Va desenvolvese tamién el programa de residencies vinculaes a Llaboral_Impulsa, promovíu pola empresa pública xixonesa y empobináu a la promoción de les industries culturales y creatives.
• Programa educativu. El centru cultural va programar visites guiaes y visites-taller a les esposiciones, coles mires de facilitar la comprensión de los conteníos a centros educativos, colectivos y públicu familiar. Amás, van desenvolvese talleres pa públicu xeneral y profesionales, y tamién cursos de robótica educativa y tecnoloxíes nueves dirixíos a les etapes d'Infantil, Primaria, Secundaria y Bachilleratu.
• Programa públicu. Llaboral Centru d'Arte va realizar dos ediciones del mercadín de creadores asturianos, pel branu y Navidá. El programa públicu del equipamientu tien como oxetivu l'atracción y xeneración de públicos diversos al Centru d'Arte, al traviés de propuestes variaes como conciertos, mercadinos, proyecciones o presentaciones.

Procesu de renovación de la dirección del centru

Amás de l'aprobación del programa d'actividaes, na xunta informóse al patronatu sobre’l procesu de renovación del cargu de dirección-xerencia del equipamientu. El centru cultural va encarar a partir de mañana la fase de selección ente les 62 solicitúes presentaes hasta agora, una cifra qu'entá podría incrementase, yá que’l plazu ta abiertu hasta'l final del día de güei.

El procesu selectivu consta de trés fases: valoración de los méritos presentaos poles persones aspirantes, ellaboración y presentación escrita d'un proyectu y entrevista d'evaluación y defensa del proyectu.

El xuráu encargáu d'evaluar les propuestes va tar formáu por dos miembros del patronatu de la fundación, trés persones integrantes de la comisión científica creada'l pasáu agostu, y una persona esterna perteneciente al ámbitu artísticu y cultural.

El patronatu aprobó les bases pa la convocatoria del puestu de dirección-xerencia'l 9 de payares. Nelles establezse que la provisión ye por una duración de cinco años prorrogables. Tamién s'especifica que la persona axudicataria va exercer la máxima responsabilidá de la dirección y xestión de la fundación, solo subordinada a les decisiones qu'adopten el patronatu y la comisión executiva, y asesorada pola comisión científica.​​​​​​​