• Les actuaciones van executase en Sotiel.lo, Alceo, Palacio, Felgueras, El Piridil.lu y La Vega’l Rei
• Les redes nueves van tener capacidá para dar serviciu a 252 persones

La Conseyería d'Alministración Autonómica, Mediu Ambiente y Cambéu Climáticu empecipió esta selmana les obres de saniamientu qu'afecten a les localidaes de Sotiel.lo, Alceo, Palacio, Felgueras, El Piridil.lu y La Vega’l Rei, en L.lena, con una inversión total de 2.161.907 euros.

Les principales actuaciones van realizase en Sotiel.lo, Alceo, Palacio y Felgueras, que disponen anguaño de redes de saniamientu precaries y separaes, y que los sos vertíos d'agües residuales nun reciben el tratamientu afayadizu.

El proyectu consiste na construcción d'una estación depuradora d'agües residuales (EDAR) en Sotiel.lo, basada nun sistema de biodiscos circulares, equipu de baxu consumu y bon rindimientu pa una población d'esti tamañu, que va vertir al calce d’El Ríu Güerna.

Tamién va executase una rede nueva formada por un colector xeneral y diversos secundarios que van recoyer los vertíos de les viviendes cercanes a les sos traces. El colector xeneral va cruciar en dellos llugares los ríos Güerna y Teso, por aciu la construcción de dos pasareles piatonales de madera. El llargor de la tubería va ser de cuasi un quilómetru y va cuntar con 43 pozos de rexistru. Amás, van crease 13 colectores secundarios, con un llargor total de 1,7 quilómetros, y 96 pozos de rexistru. L'actuación incluye, asina mesmo, 107 acometíes domiciliaries.

Amás, va executase'l saniamientu d’Alceo, Palacio y Felgueras, cola cuenta de recoyer los vertíos dispersos y conducilos por gravedá al colector interceptor del ríu L.lena, perteneciente al sistema de saniamientu de la EDAR de Baíña. Esta actuación va dexar suprimir l'actual depuradora d’Alceo.

La obra complétase con actuaciones complementaries na rede de saniamientu d’El Piridil.lu y La Vega’l Rei, asina como cola reposición de toles propiedaes y bienes afectaos pol pasu de les conducciones.

Les actuaciones van beneficiar a la población actual, que suma 172 habitantes, y van tener capacidá pa dar serviciu a 252 persones.

 El proyectu, con un plazu d'execución de 24 meses, ta cofinanciáu pol Fondu Européu de Desenvolvimientu Rexonal (Feder).​​​​​​