• Esta iniciativa del comisionáu pal Retu Demográficu, del que se presentaron güei los resultaos, va estendese a tolos municipios del ámbitu rural l’añu qu’entra

 
 La encuesta a nuevos residentes de Somiedu reflexa'l potencial de los conceyos rurales p’atraer población. Esta iniciativa, impulsada pol comisionáu pal Retu Demográficu, Jaime Izquierdo, va estender en 2022 a tolos conceyos de l’área rural, col fin de determinar les demandes y intereses d'estos vecinos y facilitar el so asentamientu.
 
La Encuesta a nuevos residentes nos conceyos rurales d'Asturies cunta cola dirección técnica de Sadei y la collaboración de la Federación Asturiana de Conceyos (FACC) y de la Rede Asturiana de Desenvolvimientu Rural (Reader). La primer consulta desenvolvióse, a manera de bancu de pruebes y esperiencia pilotu, xuntu col Conceyu de Somiedu. 
 
Esti análisis xustifícase nel fechu de que nos últimos años, y bien especialmente a partir de la crisis sanitaria causada pola covid, detectóse la llegada de residentes nuevos a los conceyos rurales. Les razones poles que se produz esti movimientu son variaes y resulta necesario conoceles y analizales. Hasta agora, la información sobre esti fenómenu ye limitada, polo que'l Principáu busca afondar neses causes pa determinar les sos característiques y la so relevancia.
 
Jaime Izquierdo participó güei na presentación telemática de los resultaos de la consulta de Somiedu, entamada pola FACC, xunto cola presidenta d'esti órganu, Cecilia Pérez; el coordinador de la comisión de retu demográficu de la FACC, Alberto Tirador; l'alcalde de Somiedu y presidente de Reader, Belarmino Fernández, y el director de Sadei, Ramiro Lomba, amás de representantes municipales de dellos conceyos rurales. 
 
Los trés oxetivos principales de la encuesta son los siguientes:
 

1. Disponer d’información cuantitativo y cualitativo, a nivel de conceyu, sobre los perfiles profesionales y característiques sociollaborales de los vecinos nuevos, mesmo que de les sos demandes, necesidaes y de les razones que los llevaron a vivir nel mediu rural.
2. Aprovechar la comunicación que facilita la encuesta pa establecer dende los conceyos vínculos colos residentes nuevos, cola mira de favorecer l’asentamientu, facilitar la so integración comunitaria y conocer les sos espectatives profesionales y vitales.
3. Sacar información qu’ayude a xenerar estratexes y propuestes pa dar continuidá al fluxu de llegada de residentes nuevos y contribuir al so asentamientu permanente.

Axúntase un anexu con datos y conclusiones provisionales de la consulta fecha en Somiedu

Consulta el anexo con datos y conclusiones provisionales de la consulta realizada en Somiedo (pdf: 1Mb)