Categories Navigation

Categories Navigation

El Principáu aprueba toles llinies d'ayuda pa fomentar l’autoconsumu y l'almacenamientu con enerxíes anovables, dotaes con 14,5 millones

03/01/2022

  • La Conseyería d'Industria pon en marcha seis programes empobinaos a empreses, particulares y alministraciones .
  • Les subvenciones cubren hasta'l 50 % del costu d'equipos fotovoltaicos y hasta’l 70 % d'instalaciones de climatización con fontes de xeneración non contaminantes.

El Gobiernu d'Asturies aprobó los seis programes d'ayudes pa fomentar la implantación d'instalaciones d’autoconsumu enerxéticu y d'almacenamientu detrás del contador, asina como pa la renovación de sistemes de climatización con enerxíes anovables, dotaes con un presupuestu de 14.536.460 euros.

Los fondos pa estes subvenciones proceden del Institutu pa la Diversificación y Aforru de la Enerxía (Idae) y van financiase al traviés del Mecanismu de Recuperación y Resiliencia (MRR). L'importe inicial va poder ampliase si la asignación s’escosa y existe demanda por parte d'empreses, particulares, comunidaes de vecinos y corporaciones locales.

Les llinies contemplen seis tipos d'incentivos:

  • Llinia 1. Dotada con 2.133.679 euros y destinada a incentivar instalaciones d’autoconsumu con fontes d'enerxía anovables nel sector servicios, con o ensin tecnoloxíes d'almacenamientu, con 1.778.066 euros p’autoconsumu y 355.613 p’almacenamientu.
  • Llinia 2. Cunta con un presupuestu de 3.208.234 euros destináu a instalaciones d’autoconsumu con fontes d'enerxía anovable n'otros sectores productivos (como la industria o l'agropecuariu), con o ensin almacenamientu, con 2.711.311 euros p’autoconsumu y 496.923 p’almacenamientu.
  • Llinia 3. Dotada con 900.520 euros y empobinada a la incorporación de sistemes d'almacenamientu d'enerxía n'instalaciones d’autoconsumu yá esistentes nel sector servicios y otros ámbitos productivos.
  • Llinia 4. Dotada con 4.979.522 euros pa instalaciones d’autoconsumu con fontes d'enerxía anovable, con o ensin almacenamientu, nel sector residencial, les alministraciones públiques y el tercer sector.
  • Llinia 5. Tien un presupuestu de 126.578 euros y financia la incorporación de sistemes d'almacenamientu n'instalaciones yá existentes nel sector residencial, les alministraciones públiques y el tercer sector.
  • Llinia 6. Tien una asignación de 7.435.246 euros pa sofitar la execución d'instalaciones d'enerxíes anovables térmiques nel sector residencial.

Los trés primeros programes, destinaos al sector empresarial, aprobólos el Conseyu de Gobiernu'l 19 de payares, mentes que les llinies 4 y 6 autorizáronse'l 29 d'avientu y van publicase nel Boletín Oficial del Principáu d’Asturies (BOPA) nos díes próximos, al igual que la llinia 5, que nun rique aprobación por parte del órganu colexáu. Los trés últimos programes van empobinaos a particulares.

A pesar de que los programes 4, 5 y 6 tán pendientes de publicación nel BOPA, toles inversiones realizaes por particulares dende la entrada en vigor del Real Decretu 477/2021, a finales de xunu, son susceptibles d'optar a les ayudes. Sicasí, ye necesario cursar la solicitú desque se publique la convocatoria.

Otra manera, nes solicitaes por sociedaes mercantiles solo van ser aceptaos los espedientes empecipiaos con posterioridá a la fecha de rexistru de la solicitú. En tolos programes, les ayudes son de concurrencia directa, por orde de solicitú, hasta escosar fondos.

 

Modalidá de les subvenciones

La modalidá d'ayuda consiste nuna subvención a fondu perdíu y l'importe varia en función del beneficiariu y del tipu d'instalación.

Nel casu de la enerxía solar fotovoltaica, les cuantíes tán llimitaes a 5 megavatios (MW) por proyectu y van cubrir dende'l 15 % pa una empresa grande hasta'l 45 % pa una pyme nun sistema pequeñu (inferior a 10 quilovatios (kW). Los particulares van poder beneficiase d'ayudes d'hasta un 40 % del costu subvencionable n'instalaciones individuales y hasta un 50 % n’autoconsumu colectivu. Pela so parte, nel sector públicu y nel tercer sector les subvenciones puen algamar el 70 % de los costos de referencia. Asina mesmo, pa la concesión de les ayudes va valorase la retirada de cubiertes d'amiantu y la instalación de marquesines pa optimizar l'usu del espaciu.

Nel casu de la eólica (hasta 5 MW por proyectu), la subvención va movese ente'l 20 % pa la instalación en grandes empreses y el 50 % nos sistemes más pequeños pa pymes. Amás, los particulares van poder beneficiase d'un 50 % y les alministraciones públiques d'hasta'l 70 %.

Nes instalaciones d'almacenamientu detrás del contador, que polo xeneral van ser bateríes, les ayudes pa les empreses van variar ente'l 45 y el 65 %, dependiendo del tamañu de la organización, mentes que particulares, alministraciones y entidaes del tercer sector van poder beneficiase d'una ayuda próxima al 70 %.

En climatización con anovables, la subvención va depender de la tecnoloxía emplegada —como la biomasa o la xeotermia— y va movese ente'l 40 y el 70 % del costu subvencionable, con un máximu por vivienda. De la mesma, les alministraciones públiques propietaries d'edificios residenciales van poder llograr el 70 %.

A lo último, acútase tamién una partida pa conceyos con menos de 5.000 habitantes, cola mira d'encarar el retu demográficu. Nesti casu, tolos conceptos anteriores van incrementase un 5 % adicional.

 

Impulsu a la creación d'empléu

Estes llinies d'ayudes al autoconsumu y l'almacenamientu d'enerxía producida por anovables enmárquense dientro d'un paquete global aprobáu pol Gobiernu d'España, que va movilizar 660 millones, ampliables hasta los 1.320 millones.

La directora xeneral d'Enerxía, Minería y Reactivación, Belarmina Díaz, señaló qu'estes ayudes van fomentar la creación d'empléu y la meyora de la competitividá d'empreses y economíes doméstiques al amenorgar los sos costos enerxéticos. Estos programes van dexar instalar n'Asturies hasta 17,3 MW de nueva potencia anovable térmica y eléctrica n’autoconsumu y una capacidá d'almacenamientu de 5,4 MW/h.

Díaz esplicó que los programes 1 y 2 tán recibiendo numberoses solicitúes desque se publicó la convocatoria y animó a empreses, particulares y entidaes ensin ánimu d'arriquecimientu a analizar les posibilidaes que s’abren con estes ayudes.