• El Conseyu de Gobiernu aprobó una partida antemanada de gastu pa entainar la execución del proyectu, que va desenvolvese nun plazu de seis meses.
• La vía va tener a lo menos cuatro metros d'anchor pa facilitar el cruz de vehículos .

La Conseyería de Presidencia va acometer nos meses próximos les obres d'ampliación y meyora del vial que xune les localidaes d’Añides y Vinxói, nos conceyos de Castropol y A Veiga, con una inversión de 411.225,60 euros. El Conseyu de Gobiernu aprobó apocayá la partida como antemanáu de gastu, cola mira d'adelantar la execución de les obres, que van enllargase mientres seis meses.

L'oxetivu ye ameyorar el trazáu y la seguridá d'una carretera de 2,8 quilómetros que parte d’Añides (Castropol), da accesu a los núcleos d'El Pereiro y As Azoreiras, nel mesmu conceyu, y remata en Vinxói (A Veiga). Trátase d'una vía tropezosa, d'unos 3,5 metros d'anchor y con xubíes moderaes, que presenta esgaste y deformaciones nel pavimentu. El vial soporta tráficu pesáu de tractores con remolque, camiones de recoyida de lleche y esplotación forestal, polo que la circulación resulta incómoda.

P'arreglar esta situación optóse por una intervención que va ameyorar la comodidá y seguridá de la circulación, al aumentar l'anchor de la calzada hasta los 4 metros, pavimentala con formigón y revistir les cunetes col fin de facilitar la maniobra de cruz de dos vehículos llixeros ensin alteriar el ritmu de la marcha.

Los trabayos previstos incluyen la llimpieza xeneral, la construcción de drenaxes y d’una cuneta nueva revistida en tol llargor, amás del estendíu d'una capa de refuerzu del firme. Tamién va pavimentase con formigón y va instalase una valla de protección llateral elástica en tramos singulares, de la que va dotase de señalización horizontal y vertical.