​​​​​​​

• Mediu Rural procedió al plantíu, roza y llimpieza de parte de la zona afectada pola quema forestal de febreru.
• Anguaño va executase la segunda parte de los llabores pa completar la recuperación d'esti entornu de protección máxima.

El Principáu remató la primer fase de los trabayos de restauración del monte d'utilidá pública Monte de Cuadonga. Tres la quema forestal qu'afectó a la zona'l pasáu febreru, el Gobiernu d'Asturies empecipió con urxencia la planificación de les actuaciones oportunes pa la so recuperación, necesaries tanto pola figura de protección del espaciu (un parque nacional) como pol riesgu d'afección con arrastres de la capa de suelu, por cuenta de les importantes xubíes.

L'actuación, que se desenvolvió en 20 de les hectárees afectaes pol fueu, centróse nel plantíu d'una masa forestal nueva d'especies frondoses autóctones: 40 % d'abeduriu (Betula celtibérica), 40 % de carbayu (Quercus robur), 15 % d'alcafresnu de cazadores (Sorbus aucuparia) y 5 % de pládanu (Acer pseudoplatanus). Primeramente, acondicionóse, rozóse y llimpióse la zona.

La intervención nes paraxes de Priena y Cuesta Ginés del monte foi complicada pola pendiente media de la fastera y tamién poles condiciones meteorolóxiques. Asina, parte del portéu de los materiales, como les malles de protección de les frondoses, los tutores de madera y les mesmes plantes, fízose n'helicópteru.

Los trabayos d'esta primer fase desenvolviéronse mientres ocho meses y supunxeron una inversión de 150.000 euros, financiaos al 100 % pol Ministeriu pa la Transición Ecolóxica y el Retu Demográficu. Anguaño va executase la segunda fase, que va ser asumida al 50 % ente'l Principáu y el Gobiernu central.

Audio del director general del Medio Natural y Planificación Rural, David Villar (mp3: 564 Kb)