Categories Navigation

Categories Navigation

El Principáu pon en marcha 21 pequeñes obres de suministru y saniamientu

03/01/2022

  • Esta inversión de la Conseyería d'Alministración Autonómica, Mediu Ambiente y Cambéu Climáticu, d’aproximao 900.000 euros, beneficia a 18 conceyos

La Conseyería d'Alministración Autonómica, Mediu Ambiente y Cambéu Climáticu punxo en marcha esti mes 21 pequeñes obres de suministru y saniamientu d'agües, que sumen una inversión global de 878.839 euros y beneficien a 18 conceyos. Esta inversión, que procede en bona midida d'escedentes xeneraos a lo llargo del añu coles baxes de les axudicaciones, enmárcase nos alcuerdos de concertación social, que busquen contribuyir a la dinamización económica d'Asturies.

Les actuaciones tán desenvolviéndose nos conceyos de Cangas, Castropol, Cuaña, Grandas, Les Regueres, Llaviana, Llanera, Llanes, Morcín, Uviéu, Ribedeva, Ribeseya, Riosa, Samartín del Rei Aurelio, Sariegu, Siero, Somiedu y Teberga.

La viceconseyera de Mediu Ambiente y Cambéu Climáticu, Nieves Roqueñí, esplicó qu'estes actuaciones son “obres de menor cuantía”, pero que resuelven “problemes urxentes rellacionaos col suministru d'agua potable y el saniamientu en distintos conceyos”.

Amás, esti mes tamién se destinaron 309.500 euros a la redacción de 22 proyectos, lo que va dexar empecipiar con mayor axilidá distintes obres previstes pal 2022 en Cabranes, Cuaña, Corvera, Cuideiru, Xixón, Grandas, Ibias, Les Regueres, Llanera, Noreña, Onís, Piloña, Ponga, Pravia, Santalla d'Ozcos, Santu Adrianu, Samartín del Rei Aurelio, Taramundi y Villayón.


Llista d'obres (pdf: 402 Kb)