• Les ayudes aprobaes güei pol Ministeriu d'industria van beneficiar a los conceyos d'Uviéu, Xixón y Carreño

Asturies va recibir 3,6 millones pa sofitar el sector comercial y impulsar la so competitividá. Les ayudes, aprobaes güei pol Ministeriu d'Industria, Comerciu y Turismu y que van ser xestionaes poles alministraciones locales, formen parte del Plan de Recuperación, Tresformamientu y Resiliencia (MRR) y diríxense a llograr mercaos urbanos sostenibles y a potenciar zones turístiques. Uviéu, Xixón y Carreño son los conceyos que van beneficiase d'esta partida. 

Los proyectos relativos a mercaos van recibir 3.214.451 euros y distribúyense d’esta miente:

• Conceyu de Xixón: 37.164 euros pal proyectu Comerciu dixital y sostenible, que se dirixe a impulsar la dixitalización p’ameyorar la competitividá de les empreses comerciales y la eficiencia enerxética, y amenorgar los costos y l'impactu ambiental de l'actividá comercial al traviés d'actuaciones adaptaes a les necesidaes de les empreses y del mercáu. Incluye actuaciones pa potenciar el centru comercial del centru y el de La Calzada. 
• Conceyu d'Uviéu: 2.380.400 euros pal proyectu El Fontán 4.0: tresformamientu dixital, ecoeficiente y comercial del mercáu municipal d’abastos d’El Fontán. Tien como oxetivu'l tresformamientu integral de la única plaza d’abastos de la ciudá, qu'actúa como llocomotora d'un área comercial, hostelera y gastronómica al empar que patrimonial y cultural y ye la exa comercial más importante de la ciudá xunto col del centru urbanu.
• Conceyu de Carreño: 196.887 euros pal desenvolvimientu del proyectu Escontra un comerciu sostenible y dixital nel centru comercial abiertu de Candás. L'actuación contempla acciones de dixitalización, sostenibilidá y sensibilización pa iniciar al comerciu local nel usu de ferramientes pa la meyor conocencia de la vecería y que dexen l'adopción de midíes de xestión adaptaes a la realidá del mercáu. Tamién prevé inversiones y acciones publicitaries a la midida de cada persona, mesmo que l'apertura de canales nueves de venta, tanto física como online, con posibilidaes nueves d'entrega de mercancía fuera del horariu comercial.

La segunda llinia pola que se van recibir estos fondos correspuende al programa de zones turístiques del que va beneficiase’l Conceyu de Xixón con una subvención de 389.096 euros pal Proyectu de compres en Xixón: meyora de l'actividá comercial en zones turístiques. Con él preténdese dar un impulsu al productu de turismu de compres y incrementar l’atractivu de les exes comerciales asitiaes nes zones de mayor presencia turística.

Pa ello, propónense intervenciones p’ameyorar ciertes cais comerciales, completar la peatonalización y la meyora de l'accesibilidá empecipiada yá va dellos años y introducir señalización comercial y turística intelixente. Prevé xenerar un conxuntu de rutes de compres nes que van integrase comercios estremaos, qu'ufierten una esperiencia de compres escelente, col soporte d’ una web específicamente dedicada y una aplicación móvil. Asina mesmo, va desenvolvese un plan de sensibilización sobre sostenibilidá, economía circular y llucha contra'l cambéu climáticu del comerciu de la zona turística y va ufiertase un programa de formación n'idiomes (inglés, francés y alemán).

Les ayudes aprobaes güei pol Ministeriu d'Industria formen parte d'un conxuntu de diez proyectos qu'a nivel nacional van suponer una inversión de 103,12 millones pa sofitar el sector comercial. Les actuaciones correspuenden a la convocatoria del 2021 de trés llinies d'ayudes incluyíes nel Plan de Recuperación, que van ser financiaes dafechu colos fondos Next Generation EU, y que contemplen una inversión total de 415 millones pal periodu 2021-2023.