• Les subvenciones del Principáu, que van movilizar un gastu global de 53 millones, van dexar crear un centenar d’empleos nuevos y caltener otros 1.015
• Les compañíes beneficiaries pertenecen al sector industrial, la sociedá de la información, los servicios, les plataformes loxístiques y los llaboratorios d'ensayu de productos, ente más otres 
   

L'Institutu de Desenvolvimientu Económicu del Principáu (Idepa), organismu autónomu adscritu a la Conseyería d'Industria, Empléu y Promoción Económica, concedió ayudes a 60 empreses pa proyectos d'inversión por un valor de 4,4 millones na convocatoria del 2021. Estes subvenciones van movilizar un gastu global de 53 millones, de la que van dexar crear 101 nuevos empleos y caltener otros 1.015. 

En comparanza cola convocatoria del 2020, supérense delles cifres: el gastu nes ayudes xube nun millón, van recibir financiamientu 29 proyectos más, van crease 35 puestos de trabayu más y va garantizase el sostenimientu de 699 más. 

Esta llinia, dirixida a autónomos, pymes y empreses grandes, tien como oxetivu favorecer la inversión productiva mediante actuaciones intensives en capital, tecnoloxía y empléu. Tamién se sofiten procesos que dexen incrementar la competitividá y productividá de les empreses, cola mira de garantizar que puean defendese con éxitu nos distintos mercaos. En total, nesta ocasión presentáronse 98 solicitúes.

En concreto, finánciense activos materiales (terrenos, edificios, instalaciones, maquinaria y otros equipos) y inmateriales (aplicaciones informátiques, propiedá industrial o concesiones alministratives), que cunten con un importe subvencionable igual o superior a 50.000 euros. 

Les compañíes beneficiaries enmárquense nel sector industrial, los servicios destinaos al desenvolvimientu de la sociedá de la información y la innovación, el catering pa centros de gran consumu, les plataformes loxístiques, los llaboratorios d'ensayu de productos, el reciclaxe y dellos proyectos turísticos. 

Del 2019 al 2021 recibieron el respaldu del Idepa pa los sos proyectos d'inversión 107 empreses asturianes, con una ayuda global de 10,6 millones. Estos fondos facilitaron la creación de 215 empleos nuevos y la movilización de más de 98 millones n'inversión. 

La resolución de les ayudes de la última convocatoria va publicase nel Boletín Oficial del Principáu d’Asturies (BOPA) el llunes viniente, día 10 de xineru.