Categories Navigation

Categories Navigation

El Gobiernu d’Asturies refuerza los centros d’I+D+i de grandes empreses con alredor de dos millones pa 12 proyectos

07/01/2022

  • Les compañíes Gonvarri, PMG, Idesa, Linter y ArcelorMittal van movilizar una inversión total de 5,5 millones n’investigación industrial y desenvolvimientu esperimental.
  • Les propuestes incluyen meyores en fabricación aditiva, dixitalización, innovación aplicada a l’automoción y mitigación d’emisiones .

El Gobiernu d’Asturies da otru impulsu a los centros d’I+D+i de grandes empreses instalaos na comunidá. La Conseyería de Ciencia, Innovación y Universidá financia con 1,9 millones doce proyectos d’investigación, desenvolvimientu tecnolóxicu y innovación que van poner en marcha les compañíes Gonvarri, PMG, Idesa, Linter y ArcelorMittal.

La convocatoria d’ayudes, xestionada pol Institutu de Desenvolvimientu Económicu del Principáu d’Asturies (Idepa), moviliza una inversión total de 5,5 millones, de los que 3,6 van apurrilos les empreses. Cuatro de los cinco centros beneficiarios creáronse nel 2020 y el quintu pertenez a ArcelorMittal.

Los proyectos tienen como oxetivu ameyorar la competitividá y actuar, amás, como elementu tractor de la economía con iniciatives enmarcaes na Estratexa d’Especialización Intelixente, dientro de los ámbitos de Polu Industrial del Aceru, Suministros, Tecnoloxía pa redes y Materiales avanzaos y sostenibles. Les llinies básiques son estes:

  • Gonvarri MS R&D presentó dos propuestes sobre investigación industrial. La primera ta centrada nel desenvolvimientu d’un ximielgu dixital d’inxeniería y operación de plantes fotovoltaiques, mentes que la segunda busca l’aumentu de la productividá de cultivos al traviés d’ivernaderos dixitalizaos.
  • Idesa Technology & Research Center SL va poner en marcha trés proyectos sobre tresformación dixital del departamentu de suministros y producción y sobre tecnoloxíes innovadores pal desenvolvimientu de nuevos productos y técniques nel procesu de fabricación.
  • Linter Technical Center SL va introducir meyores en motores neumáticos y va ellaborar un plan estratéxicu pal centru d’I+D+i pa un periodu de dos años.
  • PMG Powertrain R&D Center SL va desenvolver dende Mieres la investigación y definición d’un procesu pulvimetalúrxicu nuevu (pa fabricar productos metalúrxicos a partir de polvu fino) pa obtención de componentes innovadores nel sector de l’automoción.
  • ArcelorMittal Innovación, Investigación e Inversión SL va trabayar nel so departamentu d’Avilés en cuatro llinies nueves: midida y mitigación d’emisiones al mediu ambiente; sistema de xestión nuevu sobre materies primes pa la optimización del fornu eléctricu; procesos nuevos sobre fabricación aditiva cola incorporación de nanomateriales y dixitalización y automatización en fabricación aditiva cola aplicación d’análisis de datos y intelixencia artificial.

La convocatoria, que la so resolución definitiva va publicase estos díes nel Boletín Oficial del Principáu d’Asturies (BOPA), subvenciona tanto activos fixos como personal técnico, material, collaboraciones esternes o adquisición de patentes.

Nel 2020, añu de creación d’esta convocatoria, aprobáronse 8 proyectos –seis d’ellos en centros de creación nueva- con una subvención concedida de cinco millones y una inversión inducida p’Asturies de 12,7 millones.