Categories Navigation

Categories Navigation

Consumu aconseya iguar una llista de compra, comparar precios y conservar la factura pa posibles cambeos y reclamaciones a lo llargo del periodu de rebaxes

07/01/2022

  • Los productos han amosar tanto’l preciu orixinal como’l que resulta depués d’aplicar el descuentu.
  • Nes adquisiciones per Internet dispónse d’un plazu de devolución de 14 díes .

El Serviciu de Consumu de l’Axencia de Seguranza Alimentaria, Sanidá Ambiental y Consumu aconseya realizar na temporada de rebaxes una compra responsable, ensin cayer n’adquisiciones compulsives de productos que nun se precisen. Por eso, aconseya ellaborar una llista colo que realmente se precise y afacese al presupuestu previstu.

Los productos adquiríos nesti periodu de descuentu tienen qu’especificar na etiqueta’l preciu anterior y el rebaxáu. Amás, han incluyir una garantía llegal, igual que cualquier artículu nuevu mercáu n’otru momentu. Nel casu de que’l productu nun precise’l periodu de garantía llegal, ésti va ser de trés años.

El Serviciu de Consumu, dependiente de la Conseyería de Salú, aconseya tamién reparar na rebaxa aplicada, porque dellos productos presenten descuentos poco significativos y puen atopase n’otres promociones a lo llargo del añu.

Tamién suxer nun facer un usu abusivu de les tarxetes de creitu p’aforrar sorpreses y poder facer frente a los pagos los meses siguientes. Si l’establecimientu almite’l pagu con tarxeta, nun va poder aplicar nengún tipu de recargu pol so usu mentes son les rebaxes.

Los establecimientos qu’anuncien rebaxes han tener polo menos la metá de los sos artículos con descuentos. Estos productos nun puen tar deterioraos o defectuosos, nin tampoco ser fabricaos a costafecha pa esti periodu, polo que tuvieron que tar primero a la venta nel establecimientu.

Los artículos con descuentos han tar identificaos claramente y bien estremaos y van poder coexistir con otros productos ensin rebaxar o con otres ventes promocionales (ufiertes, saldos...).

Desque se fixo la compra ye importante esixir y guardar el ticket o factura, al ser imprescindibles pa cualquier reclamación o pa facer efectiva la garantía nel casu de que’l productu presente dalgún defectu.

Nun existe obligación llegal de volver el dineru o descambiar l’artículu mercáu, sacante que seya defectuosu. Por esta razón, ye conveniente consultar la política de devoluciones de cada establecimientu, amás de los plazos, les condiciones y si se vuelven les perres o se da un vale.

 

Precauciones énte’l comerciu electrónicu

El comerciu electrónicu consolídase nos vezos de consumu y añu tres d’añu esperimenta una medría curiosa, polo que convién tener en cuenta qu’estes compres faen al usuariu más vulnerable énte posibles engaños o estafes. Nesti sentíu, Consumu aconseya verificar les condiciones de seguranza de la páxina y comprobar que la barra de direcciones empieza per https://, cola “s” de seguranza, o que tien el símbolu del candáu o llave.

Amás, ye importante desconfiar d’ufiertes a precios mui rebaxaos y consultar les opiniones d’otros usuarios sobre’l vendedor. Al realizar una compra per Internet dispónse de 14 díes pa volver lo mercao ensin sufrir nenguna penalización.

 

Reclamación de derechos

En casu de tener un problema, tien que s’intentar solucionalo amistosamente col establecimientu. De nun poder llegar a una solución satisfactoria, pue solicitase la fueya de reclamaciones, que l’establecimientu tien la obligación de facilitar, y dir a cualquier Oficina d’Información al Consumidor (OMIC) o al Serviciu de Consumu de l’Axencia de Seguranza Alimentaria, Sanidá Ambiental y Consumu p’asesorase y presentar la reclamación correspondiente.

El Serviciu de Consumu recuerda que mercar nos establecimientos adheríos al Sistema Arbitral de Consumu garantiza una solución amistosa, rápida y gratuita de les reclamaciones potenciales.