​​​​​​​

• L’oxetivu ye entainar nel desenvolvimientu de la Llei estatal p’ameyorar el funcionamientu de la cadena alimentaria y reforzar les bones práctiques nel marcu de les competencies de la Conseyería de Mediu Rural.
• Estos órganos de consulta y análisis van tar integraos por representantes de l’Alministración autonómica y de tolos sectores implicaos: el primariu, l’industrial, la distribución y los consumidores .

El Gobiernu d’Asturies va constituyir les meses sectoriales de la carne y de la lleche p’ameyorar la so cadena de valor. Con esta midida, la Conseyería de Mediu Rural y Cohesión Territorial quier avanzar nel desenvolvimientu y siguimientu de la Llei estatal p’ameyorar el funcionamientu de la cadena alimentaria, clave pa llograr unes rellaciones comerciales más xustes, equilibraes y tresparentes, nel marcu de les competencies del Principáu. Otru de los oxetivos ye reforzar y poner en valor les bones práctiques na comunidá autónoma.

Estos órganos de consulta y análisis van ser una ferramienta de respuesta coordinada frente a les dificultaes de rentabilidá de les esplotaciones familiares agroganaderas. D’esta manera, van tar integraes por responsables del Principáu y representantes de tolos sectores concerníos: el primariu, l’industrial, el de distribución y los consumidores.

Esti foi ún de los asuntos analizaos na xunta telemática del Conseyu Agroalimentariu celebrada esta tarde. Nel alcuentru tamién s’apurrió un borrador de declaración de compromisos pa que los miembros del conseyu realicen les sos aportaciones. Na próxima xunta d’esti órganu, puesta pa dientro de dos selmanes, ta previsto que se constituyan les meses y s’alcuerde un decálogu que va ser la fueya de ruta de los órganos.

Les meses de trabayu pa los sectores lacteu y cárnicu súmense a les que yá existen de la mazana y la sidra y de los quesos. Amás, va dase continuidá al llabor del observatoriu de precios vinculáu a la llei estatal. El desenvolvimientu de toes estes midíes va facese de forma coordinada col calendariu establecíu pol Ministeriu d’Agricultura, Pesca y Alimentación.

Amás, el conseyeru de Mediu Rural y Cohesión Territorial, Alejandro Calvo, informó na xunta sobre les midíes puestes en marcha y el trabayu realizáu pol so departamentu anguaño. Calvo esplicó que’l cambéu de les bases del Programa de Desenvolvimientu Rural (PDR) dexó que nel 2021 aumentare en más de 14 millones la dotación correspondiente a les ayudes de la Política Agraria Común (PAC) nun momentu delicáu pal sector.

Na mesma llinia, y cola mira de dotar de liquidez a los profesionales cuando más lo precisen, punxéronse tolos medios pa qu’entainaren los pagos de la PAC. Asina pudo abonase más del 90 % del total de la convocatoria del 2021 primero de rematar l’exerciciu pasáu. Trátase d’unes ayudes perimportantes pa llabradores y ganaderos, que suponen hasta’l 30 % de la renta disponible nes esplotaciones.

Calvo tamién recordó que nestos momentos hai dos convocatories abiertes del PDR que movilicen 25,6 millones y van ayudar a dar soporte al texíu productivo y social del mediu rural, xenerar empléu y garantizar l’actividá.

D’esta manera, ta activu’l procesu de les ayudes del programa Leader, dotaes con 16,3 millones pa les llinies d’empreses, entidaes locales y asociaciones ensin ánimu d’arriquecimientu y que se conceden al traviés de los once grupos de desenvolvimientu local.

Per otru llau, permanez abierta la convocatoria del 2022 de subvenciones a les industries en tresformación, comercialización y/o desenvolvimientu de productos agrícoles y n’inversiones en tecnoloxíes forestales, a la que se destinen 9,3 millones.