• L’Executivu trabaya pa disponer una llinia compensatoria d’ayudes cola mayor celeridá posible
• El Principáu repartió l’añu pasáu 109,2 millones pa sofitar los sectores más perxudicaos poles restricciones

El Gobiernu d’Asturies informó previamente a la organización Otea, integrada na mesa de turismu de la Federación Asturiana d’Empresarios (FADE), de les midíes complementaries que diben aplicase pa contener la espansión de la fola nueva del coronavirus, tal como manifestó’l conseyeru de Salú, Pablo Fernández Muñiz, el martes na Xunta Xeneral. 

El gobiernu trató estes cuestiones -qu’incluyen, por exemplu, l’adelantu del horariu de zarru na hostelería- nos contactos col sector, igual que se fixo les otres veces. Nestes conversaciones participó, amás de Salú Pública, la conseyera de Cultura, Berta Piñán. Nelles, especificáronse espresamente les restricciones que se diben tomar. Ello ye qu’esti estremu -la información previa a la patronal- yá se confirmare na rueda de prensa del Conseyu de Gobiernu estraordinariu del 24 d’avientu, convocáu precisamente p’aprobar les midíes nueves.

El Principáu adoptó estes decisiones con fundamentu técnicu y coles mires de protexer la salú pública y la vida, como se vieno faciendo de magar empezó la pandemia.

L’Executivu trabaya, per otru llau, na habilitación d’una llinia d’ayudes compensatories pa los establecimientos afectaos poles llimitaciones. Van tramitase lo más apriesa posible y van sumar un montu económicu importante. Esti compromisu asumiólu públicamente’l vicepresidente del Principáu, Juan Cofiño. Namás l’añu pasáu, el Gobiernu d’Asturies distribuyó 109,2 millones pa compensar a los diversos sectores perxudicaos, perriba del fondu presupuestáu de primeres (100 millones). Estes ayudes finánciense con cargu a los recursos adicionales apurríos en calidá de sofitu a la recuperación pa la cohesión y los territorios d’Europa (REACT-EU).