Categories Navigation

Categories Navigation

Mediu Ambiente axudica en 907.976 euros les obres de conexión del saneamientu d’Andrín, en Llanes

11/01/2022
  • El proyectu, con un plazu d’execución de 20 meses, va beneficiar a más de mil habitantes

La Conseyería d'Alministración Autonómica, Mediu Ambiente y Cambéu Climáticu axudicó en 907.976 euros les obres de conexón del saneamientu d’Andrín, en Llanes. L'actuación, que cunta con un plazu d'execución de 20 meses, va beneficiar a 1.022 habitantes.

Los trabayos van permitir conducir, por aciu un bombéu y la so tubería d’ impulsión, les agües residuales d’Andrín a la rede de saneamientu de San Roque l’Acebal pa la so depuración na estación de Llanes. 

N’Andrín van instalase dos bombes pa propulsar les agües residuales del núcleu urbanu por aciu una tubería d’impulsión. Pal so treslláu hasta San Roque l’Acebal construyirá otra tubería de 400 milímetros de diámetru y 1.330 metros de llargor. 

En cruciando per debaxo de l'autovía na redolada de San Roque l’Acebal, les agües residuales van dirixise en gravedá por una conducción de 580 metros hasta incorporase al saneamientu d'esta localidá.

La inversión, cofinanciada pol Fondu Européu de Desenvolvimientu Rexonal (Feder), distribúyese en dos añalidaes: 850.000 euros esti añu y 57.976 en 2023.

Nel conceyu de Llanes, la conseyería tamién ta executando les obres que van permitir tratar les agües residuales de Balmori y Posada na estación depuradora de San Xurde, antes del so arramáu al mediu natural. A esta actuación, Medio Ambiente destinó 1.567.162 euros. 

Igualmente, Medio Ambiente ta realizando les obres d'adecuación  y renovación de les estaciones de bombéu de Cué, Toró, Celoriu, Niembru y Borizu, toes elles pertenecientes al sistema de la estación depuradora de Llanes con una inversión de 1.079.035 euros.