Categories Navigation

Categories Navigation

Educación propón que’l Colexu Patronato San José albergue a tol alumnáu del San Vicente de Paúl

14/01/2022
  • La propuesta combina l’usu d’espacios vacíos dientro del centru cola instalación d’aules modulares nel esterior 
  • El Principáu va aprobar una autorización provisional hasta la final del cursu escolar


La Conseyería d’Educación propunxo que’l Colexu Patronato San José acueya a tol alumnáu del Colexu San Vicente de Paúl, que nun pudo volver a entamar l’actividá lectiva presencial, depués de que’l 5 de xineru l’edificiu sufriere daños na estructura. Técnicos de la conseyería acompañaos pola dirección, la propiedá y la titularidá de dambos centros xixoneses, visitaron yá les instalaciones y comprobaron les posibilidaes del inmueble.

La propuesta consiste n’aprovechar un total de 18 aules disponibles y acondicionar otros espacios alternativos, como la biblioteca o la sala que s’usa como ximnasiu de los primeros cursos de Primaria. Amás, el Patronato San José dispón de marxe abondu nel esterior pa instalar les aules modulares necesaries p’acoyer al alumnáu que nun tenga sitiu dientro del edificiu principal.

Esta solución escepcional rique de la firma previa d’un alcuerdu priváu ente los centros educativos, que tienen concertaes les enseñances d’Infantil, Primaria y Secundaria. Dambos edificios pertenecen a la Congregación de les Fíes de la Caridá, anque la titularidá del San Vicente correspuende a la Fundación Educere.

Pela so parte, la Conseyería d’Educación, cola mira de protexer los derechos del alumnáu escolarizao nel Colexu San Vicente de Paúl, yá empezó d’oficiu’l procedimientu pa dictar una autorización provisional, hasta final de cursu, qu’habilite esta organización nueva. Agora, la titularidá del centru va poder alegar cuála ye la situación y solicitar el treslláu temporal al Colexu Patronato San José.