Categories Navigation

Categories Navigation

El Principáu amplía'l so espaciu en Fitur p’alcuentros empresariales, cola naturaleza y la gastronomía como reclamos principales

14/01/2022

la viceconsejera de Turismo, Graciela Blanco

  • L’estand d'Asturies crez un 30 % pa facilitar los contactos ente profesionales y les presentaciones del sector turísticu.
  • La Cocina de paisaxe y la cultura sidrera destaquen tamién nel programa de la feria.

El Gobiernu d'Asturies va participar na 42 Feria Internacional de Turismu (Fitur) col enfotu de reforzar énte profesionales y visitantes el lideralgu de la comunidá como destín de naturaleza y bienestar, seguru y sostenible. La Cocina de paisaxe y la candidatura de la cultura sidrera a patrimoniu inmaterial de la Unesco van tener tamién el so protagonismu nel estand asturianu.

La viceconseyera de Turismu, Graciela Blanco, presentó güei los detalles xenerales del espaciu del Gobiernu d'Asturies na feria, que va abrir les sos puertes el miércoles, día 19, y va rematar el domingu 23. L'espaciu crez nesta edición un 30 %, hasta algamar 901 metros cuadraos, de cuenta que gana amplitú pal área destinada a los alcuentros profesionales y pa la zona de presentaciones.

D'alcuerdu col apueste del Principáu pola sostenibilidá y el compromisu medioambiental, l'espositor construyóse y decoróse con materiales sostenibles, reciclaos y reciclables. Nel so interior van tener llugar más d'una ventena de presentaciones de proyectos, iniciatives y eventos impulsaos por promotores del sector turísticu, tanto públicos como privaos. Ente los actos más destacaos figura la celebración d’una mesa redonda sobre la cultura sidrera y la esposición de los planes de sosteniblidá turística financiaos con fondos europeos. La gastronomía tamién va ser protagonista, con talleres desenvueltos por embaxadores de Cocina de paisaxe.

Per otra parte, Asturies va tar presente en dalgunos de los eventos temáticos que s'entamen de forma paralela a la feria, como Fitur MICE, destináu al turismu de xuntes, congresos, eventos y incentivos pa la contratación especializada n’ámbitu nacional y internacional.

Tres les xornaes dedicaes a profesionales y empreses, mientres la fin de selmana Fitur va abrir les sos puertes al públicu xeneral.

L'espaciu d'Asturies na feria va ufiertar delles actividaes d'animación centraes fundamentalmente na gastronomía y realizaes mediante xuegos y interaccciones colos visitantes.

El videu sobre l’estand del Principáu en Fitur pue vese nel enllaz https://cutt.ly/CIgJad3


Programa d'actos (pdf: 388 Kb) (n'español)