Categories Navigation

Categories Navigation

El Gobiernu d'Asturies presenta al sector el Programa Estratéxicu d'Economía Social, que va movilizar 6,5 millones hasta’l 2025

14/01/2022

  • El proyectu incluye 6 oxetivos estratéxicos con 19 midíes específiques d’apoyu pa impulsar l'actividá de cooperatives y sociedaes llaborales 
  • Plantega la creación d'un fondu de capital grana y llinies nueves d'ayudes a la inversión, l'ampliación de mercaos, el relevu xeneracional y la creación de plataformes de comercialización
  • Enrique Fernández: “Esti ámbitu económicu pue contribuyir de manera importante al procesu de recuperación y a combatir la despoblación nel mediu rural”
     

La Conseyería d'Industria, Empléu y Promoción Económica va destinar 6,5 millones nel periodu 2022-2025 a la promoción, impulsu y meyora de la competitividá de les cooperatives y sociedaes llaborales, según anunció güei’l conseyeru, Enrique Fernández, mientres la presentación del Programa Estratéxicu de la Economía Social.  

El titular d'Industria anunció esta inversión nuna xunta telemática del Conseyu Asturianu de la Economía Social (CAES), l'órganu colexáu asesor y consultivu pa les actividaes rellacionaes col empléu colectivu nel Principáu.

La ellaboración del programa estratéxicu, frutu d'un trabayu colaborativu, ye unu de los compromisos del programa de llexislatura de la conseyería y quier impulsar el desenvolvimientu y l'afitamientu de la economía social, asina como l’entamamientu colectivu. Amás, pretende dar respuesta a les demandes y necesidaes del sector.  

El documentu encara, de manera integral y con visión estratéxica, la situación actual y les midíes de sofitu al sector, col fin de favorecer  la so crecedera mediante la ordenación de los instrumentos normativos y financieros, la revisión de les llinies d'ayudes y la identificación de les prioridaes. 

El programa estratéxicu, que les sos llinies xenerales desenvolvió na xunta del CAES el director xeneral de Comerciu, Entamamientu y Economía Social, Julio González Zapico, articúlase sobre seis grandes oxetivos y 19 midíes o acciones específiques. Les seis exes prioritaries son:

  1. Sofitu al empléu y al entamamientu mediante acciones que favorezan la creación d'empreses y puestos de trabayu y qu'utilicen fórmules d'economía social.
  2.  Impulsu al afitamientu de les empreses actuales pa potenciar la so competitividá, ameyorar la so dimensión y facilitar la creación d’empleos nuevos.
  3. Ameyorar la visibilidá del sector, dar a conocer los valores y opciones qu'ufierta y contribuyir a la so reconocencia social.
  4. Incorporar la innovación social nesta actividá empresarial.
  5. Favorecer la participación activa de les entidaes representatives n’ámbitu institucional.
  6. Fomentar la inclusión social nel sector.

Ente les 19 midíes incluyíes nel documentu, contémplase'l refuerzu de la capitalización de les empreses, la creación d'un fondu de capital grana empobináu a la economía social, l'apertura de llinies d'ayudes a la inversión, a l'ampliación de mercaos, al relevu xeneracional y a la creación de plataformes de comercialización, mesmo que’l desenvolvimientu d'un plan de tresformamientu dixital pal sector. 

Prevése tamién la firma d'un alcuerdu col Serviciu Públicu d'Empléu del Principáu (Sepepa) pa la definición d'un programa de formación específicu. Amás, el testu incorpora acciones d'espardimientu y sofitu específicu a los proyectos d’entamamientu nel mediu rural, de cuenta que se maximice l'aportación de la economía social énte'l retu demográficu.

El conseyeru d'Industria sorrayó que'l Gobiernu d'Asturies da respuesta con esti programa a una demanda del sector. “El documentu va contribuyir decisivamente a la so crecedera con midíes que van facilitar tanto la creación d’empreses nueves como'l desenvolvimientu d'aquelles que, pola so implantación, tean plantegándose la espansión, la diversificación y l'accesu a mercaos nuevos”, destacó.

Al so xuiciu, el programa va facilitar a cooperatives y sociedaes llaborales les ferramientes estratéxiques pa convertise en protagonistes nel procesu de recuperación de la economía tres la crisis derivada de la pandemia, asina como na llucha contra la despoblación nel mediu rural. “Les midíes plantegaes nacen como respuesta a una busca de soluciones pal sector realizada xunto con representantes de les empreses, espertos de diverses adscripciones y axentes sociales. Por ello creemos que tienen el potencial abondo pa marcar un antes y un depués na economía social asturiana”, señaló Fernández. 

Radiografía del sector na comunidá

El sector de la economía social fórmenlu n'Asturies unes 600 empreses que xeneren cuasi 5.000 empleos directos. El 47,6 % de les compañíes son sociedaes llaborales, aproximao’l 30 % cooperatives de trabayu asociáu, un 19,7 % cooperatives agroalimentaries y el 9,8 % sociedaes agraries de tresformamientu. En xunto, representen el 6,4 % del texíu empresarial del Principáu.

Estes sociedaes tán fundamentalmente na zona centru de la comunidá, siguida pola comarca occidental y, en muncha menor midida, nel oriente y nes cuenques mineres. 

El 63 % de les empreses desenvuelve la so actividá nel sector servicios. Por ámbitos económicos, el primariu y l'industrial suponen, respectivamente, el 15,4 y el 13,5 %, mentes que la construcción participa col 8,1 %.  

La potencia del cooperativismu destaca sobre manera nel sector agrariu y ganaderu, con 35 cooperatives agroalimentaries n'activo y unes 60 sociedaes agraries de tresformamientu.


 Declaraciones del consejero de Industria, Empleo y Promoción Económica, Enrique Fernández (mp3: 2471 Kb)