Categories Navigation

Categories Navigation

El Principáu establez delles franxes horaries pa la circulación de vehículos pela carretera LA-7, en Llangréu

14/01/2022
  • La vía ta abierta al tráficu de 08:00 a 10:00; de 14:00 a 16:00 y de 18:00 a 20:00 hores
  • La Conseyería de Mediu Rural y Cohesión Territorial sigue colos estudios del argayu y instala testigos dixitales en dellos puntos

 El Principáu reabre güei al tráficu la carretera LA-7, en Llangréu, en trés franxes horaries al día. Asina, habilítase’l pasu de toa clas de vehículos de 08:00 a 10:00, de 14:00 a 16:00 y de 18:00 a 20:00 hores. Lo demás del tiempu namás se va dexar circular a vehículos d’emerxencia.

 L’argayu’l mes pasáu de la escombrera averada al llugar de Pampiedra obligó a zarrar al tráficu les carreteres LA-7 y LA-8. Les primeres actuaciones centráronse na retirada del material cayío y nel acondicionamientu de les víes, lo que dexó restablecer la circulación na LA-8, que comunica’l valle de Samuño con Pampiedra y dellos llugares.

 La Conseyería de Mediu Rural y Cohesión Territorial sigue colos estudios de siguimientu del argayu, qu’afecten sobre manera a la seguranza na LA-7, y ta poniendo testigos dixitales en dellos puntos. Trátase d’acelerómetros con rexistru continuu de desplazamientos y sistema d’alarma, que dexen identificar movimientos en tiempu real y adoptar midíes si ye menester. Ta previsto que los trabayos d’allugamientu d’estos testigos s’allarguen, aproximao, diez díes.