Categories Navigation

Categories Navigation

Les obres pa evitar argayos enriba de la depuradora de Cuideiru acaben esti mes depués d’una inversión de 875.000 euros

14/01/2022

​​​​​​​el vicepresidente y consejero de Administración Autonómica, Medio Ambiente y Cambio Climático, Juan Cofiño; el alcalde de Cudillero, Carlos Valle, y de la directora general del Agua, Vanesa Mateo

  • El vicepresidente Juan Cofiño, que visitó güei l’actuación, anuncia una inversión de 2,7 millones pa executar la segunda fase del saniamientu de Santa Marina y Castañeras.

Les obres de contención de la turria que ta enriba de la depuradora d’agua residual de Cuideiru van acabar esti mes depués d’una inversión de 875.000 euros, según anunció güei’l vicepresidente y conseyeru d’Alministración Autonómica, Mediu Ambiente y Cambéu Climáticu, Juan Cofiño.

El conseyeru, que visitó l’actuación xunto al alcalde de Cuideiru, Carlos Valle, y la directora xeneral del Agua, Vanesa Mateo, esplicó que la finalidá de los trabayos ye protexer les instalaciones de depuración de los argayos que se producen dende la turria que limita la esplanada del puertu pel sur.

El proyectu, que se fixo con calter d’emerxencia, consistió na apertura d’accesos a la cabeza de la turria, amás de roces y saniamientu manual de peñes na superficie. Tamién s’acometió un sistema d’estabilización, formáu por una maya y anclaxes llaterales de doble cable flexible, pa evitar posibles cayíes de piedres o bloques de gran volume na parte alta de la fastera.

Amás, ente otres actuaciones, instaláronse dos barreres dinámiques y repunxéronse elementos estrozaos por argayos.

La estación recibe los vertíos de Cuideiru, Aronces, El Pitu, Villamar y la parroquia de Piñera. Desque depurao, l’agua viértese al mar al traviés d’un emisariu submarín de más de 600 metros de llargor.

 

Inversiones nueves

Otra manera, Cofiñu anunció que’l so departamentu va llicitar anguaño la segunda fase de dos proyectos de saniamientu que van suponer una inversión total de 2,7 millones nun periodu de trés años, de los que 1,3 millones van dedicase a Castañeras y 1,4, a Santa Marina.

Estes actuaciones súmense a otres executaes apocayá en Cuideiru, como la conexón de los vertíos de Soutu Lluiña al colector d’El Ríu Esqueiru, depués d’una inversión de 280.000 euros, o la incorporación d’un filtru pa quitar la turbieza nel suministru d’agua potable del sistema de suministru de la mesma localidá, nel que s’invirtieron 107.000 euros.

 


Audio del vicepresidente y consejero de Administración Autonómica, Medio Ambiente y Cambio Climático, Juan Cofiño (mp3: 584 Kb)