Categories Navigation

Categories Navigation

Asturex refuerza'l sistema de tramitación alministrativa d'ayudes a empreses p’ameyorar la so eficacia

15/01/2022
  • La xestión nueva adáptase a los requisitos de tresparencia qu'esixe la Unión Europea pa les subvenciones públiques
  • Los cambeos van ser efectivos a partir del llunes, día 17, y caltiénse el procedimientu telemáticu pa les solicitúes

 
La Sociedá de Promoción Esterior Principáu d'Asturies (Asturex) va modificar a partir del llunes próximu, día 17 de xineru, la tramitación alministrativa de les ayudes a empreses coles mires d'ameyorar la tresparencia y la eficacia. El procedimientu nuevu esixe que sía l'apoderáu de cada compañía quien presente la solicitú formal de los servicios y programes, magar la pitición de presupuestu va poder siguir realizándose como hasta agora, na web www.asturex.org.
 
Asturex axunta agora tolos sos servicios individuales y programes en dos tipos de llamamientos, que van publicase na so web, magar van poder efectuase anuncios específicos p’aquellos qu'asina lo rican poles sos característiques singulares tocantes a oxetivos, plazos o estructura.
 
Otra manera, les acciones de promoción que se realicen con calter institucional y supongan la participación del Principáu van siguir desenvolviéndose como hasta agora, colos requisitos qu'en cada casu se demande na convocatoria publicada na web d’Asturex.
 
La operativa nueva esixe que sía'l representante llegal de la empresa quien solicite formalmente l'ayuda. Pa entainar la tramitación, la sociedá de promoción va habilitar un rexistru nuevu de documentación alministrativa que va centralizar la información riquida a cada compañía en distintes solicitúes.
 
Les ayudes, suxetes al réxime de minimis, van permanecer abiertes dende'l 1 de xineru hasta'l 5 d'avientu del añu de tramitación. Les solicitúes van xestionase por orde de llegada, hasta escosar el presupuestu anual de cada modalidá, ensin puntuar, por tanto, por concurrencia competitiva.
 
D'esta miente, Asturex non solo va entainar y va reforzar los apoyos económicos a los sos programes y servicios, sinón que va ameyorar la tresparencia y eficacia pa impulsar la internacionalización de les empreses asturianes.
 
Anguaño, si la situación de pandemia lo dexa, la sociedá prevé recuperar munches de les acciones de promoción esterior que se desenvolvieron de forma parcial l’exerciciu pasáu, coles mires de favorecer la participación de más empreses nos sos programes y servicios.​​​​​​