Categories Navigation

Categories Navigation

El Principáu va cortar l'AS-15 en Soutu (Tineu) del llunes al sábadu al tener qu'ampliar les voladures controlaes na fastera

15/01/2022
  • Esta midida, que s'adopta pa realizar detonaciones nueves y retirar el material, va enllargase dende'l mediudía del día 17 hasta la mesma hora del 22
  • Mientres los trabayos, Infraestructures va establecer un itinerariu alternativu per Tinéu al traviés de l’AS-215, l'AS-216 y la N-634​​​​​​​

 
El Gobiernu d'Asturies va cortar l'AS-15, al altor de la localidá tinetense de Soutu, dende'l mediudía del llunes próximu, día 17, hasta la mesma hora del sábadu 22, cola mira de retirar capes nueves de roca inestable.
 
Esta decisión adoptóse tres realizar ayeri nesta zona, nel macizu asitiáu a unos 250 metros de la vía, les primeres voladures, que provocaron mayor cantidá de material desprendío del que s'esperaba, por cuenta de la heteroxeneidá de la formación rocosa. Por esta razón, anque los cortes nel corredor del Narcea plantegárense primeramente de manera intermitente, la Conseyería de Mediu Rural y Cohesión Territorial tuvo que proceder al zarru total de la carretera hasta les 18:00 hores, cuando s’abrió nuevamente la circulación.
 
Desque los técnicos d’esti departamentu reevaluaron la situación tres les primeres voladures, y en previsión de que nel restu del macizu asoceda de forma similar, considérase necesario aumentar el númberu de detonaciones pa garantizar la seguridá de los usuarios de l’AS-15. Asina, anque nun principiu taben previstes namás pal miércoles, día 19, tamién van llevase a cabu'l llunes 17.
 
N'efectuando les primeres detonaciones, el Principáu detectó capes de pizarra y arenisques bien estratificaes y agrietaes, que podríen aniciar desprendimientos nuevos, col peligru consiguiente pa los usuarios de la carretera. La fastera resultó más heteroxénea de lo previsto, polo que les voladures provocaron mayor cantidá de roca desprendida.
 
Amás, prevése qu'asoceda lo mesmo nes próximes detonaciones, yá que les condiciones del terrén onde se van a acometer son asemeyaes a les de la zona na que se practicaron ayeri.
 
Nestes circunstancies, y col fin de garantizar la seguridá, va procedese al corte total del tráficu de la vía ente les 12 hores del llunes próximu y les 12:00 hores del sábadu. Mientres duren los trabayos, el Principáu va establecer un itinerariu alternativu per Tinéu, utilizando les carreteres AS-215, AS-216 y la N-634.
 

Si los llabores de llimpieza de la fastera tres les voladures y la retirada de los restos pudieren llevase a cabu con mayor axilidá, el corredor del Narcea reabriría en cuanto quedara llibre, siempre y cuando les condiciones de seguridá asina lo dexen​​​​​​​