Categories Navigation

Categories Navigation

El Principáu coordina’l dispositivu del censu anual d’aves acuátiques ivernantes, que l’añu pasáu contabilizó 19.000 exemplares

14/01/2022

 
​​​​​​​​​​​​​

  • Les especies más abondoses ente les 67 rexistraes foron la gaviota de les pates marielles y el coríu real
  • El director xeneral del Mediu Natural visitó güei ún de los grupos de trabayu n’observatoriu de Rusecu, remocicáu va poco como’l de La Polina

La Conseyería de Mediu Rural y Cohesión Territorial coordina’l dispositivu d’ellaboración del censu anual d’aves acuátiques ivernantes d’Asturies, nel que participa un centenar de persones. L’añu pasáu contabilizáronse 19.072 exemplares pertenecientes a 67 especies. Les más abondoses foron la gavota de les pates marielles (Larus michahellis), con 4.877 exemplares censaos, y el coríu real (Anas platyrhynchos), con 4.280.

Los equipos van atropar información dende güei y hasta’l domingu nes ríes del Eo, Navia, Nalón, Villaviciosa, Ribeseya y Tinamayor, y en delles zones de costa, ríos, llagos y banzaos de tola comunidá. Depués, los datos van unviase a la Sociedá Española d’Ornitoloxía, encargada de centralizar los censos a nivel nacional. L’añu pasáu, la Ría del Eo, con un total de 2.122 exemplares, foi l’enclave onde s’alcontró’l más númberu d’aves.

La iniciativa, imprescindible p’actualizar los datos sobre cada especie a nivel européu, dexa conocer la importancia de los distintos sitios pa la ivernada de les aves. Amás, la información sacada a lo llargo de los años ayuda a descubrir los enclinos de les poblaciones.

Los grupos  de trabayu tán integraos por personal técnico y axentes del Mediu Natural, amás de collaboradores de la Sociedá Española d’Ornitoloxía (SEO/Birdlife), el Grupu Ornitolóxicu Mavea y el Grupu Ibéricu de Aniyamientu.

El director xeneral del Mediu Natural, David Villar, visitó güei l’equipu qu’ellabora’l censu nel observatoriu del banzáu de Rusecu, nel Parque Natural de Redes, espaciu integráu na Rede Natural d’Asturies (RENA). Esta zona cunta con gran variedá d’aves acuátiques tol añu, ente les que destaquen el coríu real, el somorguyín o la garcia real, y ye tamién sitiu de recepción d’especies migratories de parte branu.

La Conseyería de Mediu Rural y Cohesión Territorial realizó obres nos dos observatorios d’aves de Sobrescobiu dende los que se recueye información pa la ellaboración del censu anal: los de Rusecu y La Polina. Asina, ameyoróse l’espaciu interior, repunxéronse paneles informativos d’interpretación y iguáronse tanto la cubierta como l’esterior.

 

Asturies, parada ideal pa les aves acuátiques migratories

 Asturies ye una zona mui llamadora pa les aves en xeneral y, particularmente, pa les acuátiques. Bona parte de la superficie de la comunidá, concretamente’l 22 %, ta considerada Zona d’Especial Protección pa les Aves (Zepa). Amás, el Principáu foi una de les primeres rexones que propunxeron la definición d’estes árees protexíes.

 Les 13 Zepa asturianes dan abellugu a 36 especies incluyíes n’anexu I de la Directiva d’Aves, la normativa europea de más rangu nesta materia. Amás, les reserves naturales de Villaviciosa y del Eo tán reconocíes nel Conveniu Ramsar, la llista de zones húmedes d’importancia internacional, sobre manera como hábitat d’aves acuátiques. ​​​​​​​

 


 Declaraciones director general de medio natural, David Villar (mp3: 494 Kb)​​​​​​​