Categories Navigation

Categories Navigation

El programa nuevu de meyora de la conectividá va actuar en más de 9.000 zones de la práctica totalidá de conceyos

15/01/2022

​​​​​​​​​​​​​​​​​​​​ 

  • El plan Unico prevé estender la banda ancha a puntos que queden fuera de les últimes actuaciones, sobre manera nel área rural
  • El conseyeru de Ciencia visita Siero, ún de los conceyos onde s’incluyeron más esplegues de fibra óptico

El plan nuevu p’ameyorar les telecomunicaciones y la conectividá n'Asturies va actuar en daqué más de 9.000 zones de la práctica totalidá de conceyos. El programa de Universalización d'Infraestructures Dixitales pa la Cohesión (Unico), busca completar los planes d'esplegue de la banda ancha que se tán desenvolviendo dende 2019 n'Asturies y amenorgar la fienda dixital, sobre manera na zona rural.
 
El conseyeru de Ciencia, Innovación y Universidá, Borja Sánchez, esplicó güei en Siero, ún de los conceyos con más puntos d'actuación incluyíos, dalgunes de les llinies d'esti plan del Ministeriu d'Asuntos Económicos y Tresformamientu Dixital. El programa va cuntar n'Asturies con una inversión global de 24 millones –la metá como subvención al traviés del Plan de Recuperación, Tresformamientu y Resiliencia- y foi axudicáu a la compañía Telefónica.
 
Sánchez caltuvo un alcuentru col alcalde de Siero, Ángel García, con quien visitó la localidá de Pañeda Nueva, ún de los pueblos que recibió fibra óptica'l pasáu añu. Siero ye unu de los conceyos con más zones recoyíes nel nuevu programa Unico, con daqué más de 770 puntos d'actuación, que suponen daqué más de 2.700 viviendes espardíes por tol conceyu. En rematando tolos planes d'esplegue, casi'l cien per cien de la población va cuntar con cobertoria de banda ancha.
 
L'oxetivu ye ameyorar l'accesu y velocidá d'internet nes cases y empreses asturianes y nes localidaes onde inda tienen zones blanques (con baxa conexón) y superar los 100 Megabytes de velocidá. Los últimos Planes d'Estensión de la Banda Ancha (PEBA), entá n'execución, van llegar al 97% de la población en cuantes se rematen, mentes qu’esti programa nuevu Unico aspira a averase al cien per cien en tolos conceyos onde sía posible.
 
El cambéu de criteriu del ministeriu a la de midir los puntos onde se va actuar –agora utilízase'l rexistru del catastru, non les unidaes inmobiliaries, y nun se fala de localidaes, sinón de zones- complica la xera de conocer al detalle y con precisión les actuaciones.
 
El ministeriu afita p’Asturies cerca de 57.000 referencies catastrales asitiaes en zona blanca, anque en munchos casos trátase d'inmuebles o zones ensin habitantes. Esos puntos onde ta previstu l'esplegue de fibra óptica distribúyese en 9.400 árees espardíes per casi tolos conceyos asturianos.
 
El númberu de puntos susceptibles d'actuación varia enforma en función de los conceyos, yá que en munchos casos yá cunten con un ampliu esplegue de banda ancha de los anteriores planes, como Navia, Valdés, A Veiga o gran parte del occidente.
 
Ente los conceyos nos que s'inclúin más zones susceptibles d'estender la fibra óptica, amás de Siero, atópase Villaviciosa, con más de 1.300 puntos de referencia incluyíos; Cangas, con 652; Llanera y Llaviana, con más de 400; o Llanes, con 385.
 
“Trátase de facer con esti plan un barríu finu de llugares que nun entraron n'anteriores planes d'estensión de la banda ancha y onde podría esplegase fibra óptica”, esplicó'l conseyeru.
 
Sicasí, Sánchez recuerda que la fibra nun ye la única opción de conectividá y en munchos casos nin siquier una posibilidá. “Pa les localidaes que dempués de la execución de tolos planes en marcha queden entá con escasa conectividá vamos tener que buscar otres soluciones, como la conectividá per satélite o aprovechar la 5G”, indica.
 
La superposición de los planes desenvueltos nos últimos años xunto col programa nuevu del ministeriu Unico asitia la conectividá per banda ancha n'Asturies cercana al cien per cien de la población. Esi ye siquier l'oxetivu final. Queden fora de tolos programes daqué más de 800 viviendes en zona blanca en tola comunidá.
 
El Plan Unico pue consultase nel enllaz: http://ow.ly/F1wF30s7naH 


 Declaraciones del consejero de Ciencia, Innovación y Universidad, Borja Sánchez​​​​​​​ (mp3: 946 Kb)