Categories Navigation

Categories Navigation

El Principáu pone en marcha una llinia nueva de sofitu al emprendimientu que prevé ayudes de 4.000 euros por proyectu

18/01/2022

 

  • La iniciativa, financiada con fondos europeos del Mecanismu de Recuperación y Resiliencia, cunta con un presupuestu de 3,98 millones pa esti añu
  • Van subvencionase empreses de creación nueva y iniciatives que promuevan la consolidación de negocios yá existentes n’actividaes vinculaes a la economía verde y la dixitalización
  • La rede de centros d’Aceppa y la Fundación pal Fomentu de la Economía Social van ufiertar asesoramientu na ellaboración de planes y informes de diagnósticu 
  • El BOPA publica güei l’estractu de les bases de la convocatoria, y el plazu de solicitú va estendese dende mañana al 31 d’agostu

 

La Conseyería d'Industria, Empléu y Promoción Económica punxo güei en marcha una llinia nueva d'ayudes al emprendimientu individual y colectivu que contempla una subvención de 4.000 euros pa cada proyectu. Esti programa, de nueva creación, ta financiáu con fondos europeos del Mecanismu de Recuperación y Resiliencia (MRR) y cuenta con un presupuestu de 3.948.000 euros p’anguaño.

L'oxetivu de les ayudes ye favorecer la creación y sostenimientu del empléu por aciu la concesión d'una cuantía fixa a persones que presenten proyectos tanto de creación de nueves empreses como d'afitamientu de negocios que yá tean en funcionamientu. El programa tien una clara orientación pa col desenvolvimientu territorial, por aciu de la promoción del insertamientu llaboral al traviés del autoempléu y el sofitu a iniciatives que traigan la creación de trabayu estable.

La xestión d'esta llínea correspuende a la Dirección Xeneral de Comerciu, Emprendimientu y Economía Social, y los proyectos subvencionaos han de dirixise prioritariamente al desenvolvimientu de la economía verde y dixital. Asina, van poder beneficiase persones físiques d'alta nel Réxime Especial de Trabayadores por Cuenta Propia o Autónomos y nel Réxime Especial de Trabayadores del Mar, según  persones xurídiques, comunidaes de bienes y sociedaes civiles.

Los 14 centros d'empreses públicos de l'asociación Aceppa y la Fundación pal Fomentu de la Economía Social (FFES) van dar asesoramientu y sofitu a los entamadores y empresarios al traviés de la plataforma CREA. Nel casu de los proyectos de nueva creación, dambes entidaes van encargase d'ufiertar tutoría a los entamadores na ellaboración de los planes d'empresa. Nel casu de negocios yá constituyíos, van ellaborar el diagnósticu de situación n'ámbitos como l'allugamientu de mercáu, l'estudiu de la competencia o l'análisis de rentabilidá del modelu.

Esti nuevu programa de sofitu al emprendimientu refuerza les actuaciones ordinaries de fomentu del empléu autónomu y l'economía social desenvueltes pola Conseyería d'Industria y los trés planes singulares puestos en marcha dende l'entamu de la llexislatura: el Programa de Digitalización del Comerciu Minorista, el Programa de Fomentu del Emprendimiento y el Programa Estratéxicu de la Economía Social, qu'en xunto van movilizar 42 millones.

Presentación de solicitúes

La presentación de solicitúes va realizase puramente per vía telemática al traviés del formulariu específicu (col códigu de solicitú AYUD0396T01) disponible na sede electrónica del Principáu d'Asturies, a la que s'apuerta al traviés del enllaz https://see.asturias.es/ 

Les bases reguladores para la concesión de les ayudes publicaron el pasáu 31 d'avientu nel Boletín Oficial del Principáu (Bopa) y güei el boletín recueye l'estractu del resolvimientu, onde se reflexa que'l plazu pa les solicitúes d'ayudes empecípiase mañana, día 19 de xineru, y remata el 31 d'agostu.

Esti programa ye una de les nueves actuaciones puestes en marcha pola Conseyería d'Industria con fondos europeos. Concretamente, enmárcase na inversión 4 Nuevos proyectos territoriales pal reequilibriu y la equidá del componente 23 Nueves Polítiques Públiques para un mercáu de trabayu dinámicu, resiliente ya inclusivu del Plan Nacional de Recuperación, Tresformamientu y Resiliencia.

Pa esti exerciciu, Industria tien contemplaos nel presupuestu 43,2 millones de fondos europeos del MRR, qu'ente otres actuaciones van financiar acciones rellacionaes cola movilidá eléctrica y sostenible, l'esplegue de tecnoloxíes d'almacenamientu y autoconsumu a partir d'enerxíes renovables y la recuperación d'espacios mineros en desusu.


 Declaraciones del director general de Comercio, Autónomos y Economía Social, Julio González Zapico (mp3: 773 Kb)