• Les estaciones de la zona norte de la ciudá y Llugones siguen rexistrando valores altos de partícules en suspensión y persisten les condiciones de ventilación desfavorables

La Conseyería d’Alministración Autonómica, Mediu Ambiente y Cambéu Climáticu caltién activu’l segundu día siguíu’l protocolu d’actuación énte episodios de contaminación del aire, nel so nivel preventivu (nivel 0), nel área d’Uviéu, al persistir niveles altos de partícules en suspensión na atmósfera y condiciones desfavorables de ventilación.

El dispositivu actívase nel so nivel 0 cuando la concentración de partícules na atmósfera ye de más de 25 microgramos por metru cúbicu (µg/m3), nel casu de les de diámetru inferior a 2,5 micres (PM 2,5) o de 45 µg/m3 pa les de diámetru inferior a 10 micres (PM 10), a lo llargo de trés díes, en polo menos una estación de la zona y, simultáneamente, existe previsión de fenómenos meteorolóxicos qu’estorben l’espardimientu de contaminantes (estabilidá atmosférica, inversión térmica y ausencia d’agua).

Según les previsiones de l’Axencia Estatal de Meteoroloxía (Aemet), la ventilación nel área d’Uviéu va ser desfavorable güei, polo que se dan les condiciones pa caltener l’alerta.

L’aglomeración del área d’Uviéu incluye, amás d’esti conceyu, los de Noreña, Siero, La Ribera y Llanera, amás de la zona industrial de Morcín.

Les estaciones de la rede de control del Palaciu de los Deportes d’Uviéu y la de Llugones, en Siero, detectaron valores percima de los topes previstos pa les partícules PM 2,5.

Los valores rexistraos nos trés últimos díes son estos:

Les demás estaciones que monitoricen la calidá del aire n’Asturies nun presenten simultáneamente valores de concentración de partícules en suspensión y condiciones desfavorables de ventilación qu’esixan l’activación del protocolu.

La Conseyería de Mediu Ambiente notificó ayeri l’activación del protocolu a los representantes de les alministraciones afectaes, al traviés de los miembros de la comisión de valoración y siguimientu. Asina mesmo, comunicóse a los servicios competentes en materia de salú pública y atención sanitaria.

Los conceyos afectaos puen adoptar les midíes que consideren afayadices pa menguar la contaminación, como’l riegu de viales y carreteres. Tamién se va reforzar la inspección ambiental a les empreses del área afectada.

El Principáu aconseya que les persones sensibles sobre manera (adultos o neños con problemes respiratorios, patoloxíes cardiaques, EPOC, etcétera, muyeres embaranzaes y lactantes) planifiquen l’actividá física y la mengüen si esperimenten síntomes. Tamién ye aconseyable que s’aparten de les víes con más tráficu.​​​​​​​