• Les estaciones de la zona norte de la ciudá y Llugones siguen rexistrando valores altos de partícules en suspensión

La Conseyería d’Alministración Autonómica, Mediu Ambiente y Cambéu Climáticu caltién activu’l tercer día siguíu’l protocolu d’actuación énte episodios de contaminación del aire, nel so nivel preventivu (nivel 0), nel área d’Uviéu, a pesar de que se prevén pa güei y los díes vinientes condiciones favorables de ventilación, al persistir niveles altos de partícules en suspensión na atmósfera.

El dispositivu actívase nel so nivel 0 cuando la concentración de partícules na atmósfera ye de más de 25 microgramos por metru cúbicu (µg/m3), nel casu de les de diámetru inferior a 2,5 micres (PM 2,5) o de 45 µg/m3 pa les de diámetru inferior a 10 micres (PM 10), a lo llargo de trés díes, en polo menos una estación de la zona y, simultáneamente, existe previsión de fenómenos meteorolóxicos qu’estorben l’espardimientu de contaminantes (estabilidá atmosférica, inversión térmica y ausencia d’agua).

L’aglomeración del área d’Uviéu incluye, amás d’esti conceyu, los de Noreña, Siero, La Ribera y Llanera, amás de la zona industrial de Morcín.

Les estaciones de la rede de control del Palaciu de los Deportes d’Uviéu y la de Llugones, en Siero, detectaron valores percima de los topes previstos pa l’activación del nivel preventivu en partícules PM 2,5. Igualmente, rexistráronse valores altos el tercer día siguíu de partícules PM10 na estación del Palaciu de los Deportes, n’Uviéu.

Los valores rexistraos nos trés últimos díes son estos: 

PM 2,5 (µg/m3)

PM 10 (µg/m3)

El Principáu aconseya que les persones sensibles sobre manera (adultos o neños con problemes respiratorios, patoloxíes cardiaques, EPOC, etcétera, muyeres embaranzaes y lactantes) planifiquen l’actividá física y la mengüen si esperimenten síntomes. Tamién ye aconseyable que s’aparten de les víes con más tráficu.

Igualmente, los niveles algamaos na zona oeste de Xixón motivaron que’l Conceyu activare güei’l protocolu d’actuación n’episodios de contaminación del aire nesa zona, nel so nivel 1, lo qu’implica l’adopción de midíes de calter informativu, de tráficu y pal sector industrial. El protocolu redactóse nel marcu d’un plan d’acción a plazu curtiu pal oeste de Xixón aprobáu pol Gobiernu d’Asturies en marzu del 2021.