• L’estand d’Asturies acueye una mesa redonda sobre les característiques y les posibilidaes del procesu

L’estand del Principáu na Feria Internacional de Turismu (Fitur) acoyó güei una mesa redonda sobre la cultura sidrera asturiana, que va ser la candidata que va representar a España en marzu énte la Unesco pa la so inclusión na Llista Representativa del Patrimoniu Mundial Inmaterial.

El director xeneral de Cultura y Patrimoniu, Pablo León, foi l’encargáu de moderar l’alcuentru, onde participaron el director de la Cátedra de la Sidra de la Universidá d’Uviéu, Luis Benito García; el presidente de la Denominación d’Orixe Protexida (DOP) Sidra d’Asturies, Guillermo Guisasola; Ana Soberón, representante del Club de Productu Sidraturismu, y Saúl Moro, presidente de l’Asociación d’Escanciadores, en nome de la patronal Otea.

Nel debate, Luis Benito García esplicó’l procesu siguíu pa optar a la declaración de patrimoniu mundial y detalló les principales característiques de la cultura sidrera: el so referente simbólicu como parte esencial de la identidá colectiva y d’una cultura con personalidá propia, los elementos que la integren y les sos distintes manifestaciones.

Guillermo Guisasola, pela so parte, apurrió información sobre la situación actual de la producción sidrera n’Asturies, y ufiertó datos del universu sidreru, como’l númberu de llagares, los tipos de sidra o los llugares de consumu fuera del Principáu. 

Les intervenciones d’Ana Soberón y Saúl Moro contestualizaron la presencia de la sidra na actividá turística. Asina, la representante de Sidraturismu esplicó la relevancia del caldu rexonal como elementu fundamental nesti sector. Pela so parte, Saúl Moro refirióse al escanciáu, un elementu esclusivu qu’apurre mayor grau de diferenciación.

Los participantes na mesa redonda coincidieron en valorar la posibilidá de que la cultura sidrera pase a formar parte de la llista de patrimoniu inmaterial, daqué que diba ayudar a difundir unes práctiques y tradiciones qu’apurren sostenibilidá al mundu rural autóctonu. Amás, diba ayudar a revitalizar les actividaes lligaes a la producción d’esta bébora y a dinamizar el sector, de la que diba impulsar les actividaes turístiques y hosteleres.