• El presidente Adrián Barbón y el conseyeru de Ciencia visitaron güei en Madrid la sede de la organización, onde se soscribió l'alcuerdu 
• El Principáu impulsa la dixitalización como mediu pa llograr la tresformación del texíu económicu y fomentar l'empléu

El Gobiernu d'Asturies y la empresa Microsoft España soscribieron güei un protocolu de collaboración pa ufiertar servicios dixitales nuevos a la ciudadanía, les empreses y los centros educativos. La cooperación ente dambes entidaes aspira a promover l'usu de les tecnoloxíes nueves, ameyorar la capacitación de la población y facilitar la tresformación dixital de les firmes rexonales.

El presidente del Principáu, Adrián Barbón, visitó güei xunto col conseyeru de Ciencia, Innovación y Universidá, Borja Sánchez, la sede de Microsoft en Madrid, onde axuntó col presidente de la entidá, Alberto Granados. Mientres l'alcuentru, encaráronse distintes iniciatives que van dexar fomentar la tresformación dixital de les pymes asturianes, sofitar el desenvolvimientu del entamamientu de base tecnolóxica y impulsar el talentu dixital como palanca de crecedera y creación d'empléu. 

La tresformación dixital ye una de les xeres qu'impulsa esta llexislatura la Conseyería de Ciencia, en llinia colos oxetivos marcaos pola Unión Europea. Esti pasu ye una condición indispensable pa llograr la modernización del texíu económicu de la comunidá, qu'esixe l'impulsu de les alministraciones públiques y tamién la collaboración coles mesmes empreses. 

Nesti contestu, el Gobiernu d'Asturies aspira a sirvir de sofitu nesti procesu a les pequeñes y medianes compañíes, qu'encaren series dificultaes nel so camín escontra la dixitalización. Tamién busca xeneralizar l'usu de tecnoloxíes nueves nes aules, como mediu pa consiguir una mayor capacitación de los futuros profesionales. De la mesma, aspira a divulgar la conocencia dixital ente la ciudadanía, con cuenta de que sirva p'ameyorar les condiciones d'empleabilidá y contribuya a l'adaptación a les necesidaes nueves de la sociedá actual.