• Les estaciones de la zona norte de la ciudá y Llugones siguen rexistrando valores altos de partícules en suspensión .

La Conseyería d’Alministración Autonómica, Mediu Ambiente y Cambéu Climáticu decidió caltener activu’l cuartu día siguíu’l protocolu d’actuación énte episodios de contaminación del aire, nel so nivel preventivu (nivel 0), nel área d’Uviéu, al persistir niveles altos de partícules en suspensión na atmósfera, a pesar de que se prevén pa güei condiciones favorables de ventilación.

El dispositivu actívase nel so nivel 0 cuando la concentración de partícules na atmósfera ye de más de 25 microgramos por metru cúbicu (µg/m3), nel casu de les de diámetru inferior a 2,5 micres (PM 2,5) o de 45 µg/m3 pa les de diámetru inferior a 10 micres (PM 10), a lo llargo de trés díes, en polo menos una estación de la zona y, simultáneamente, existe previsión de fenómenos meteorolóxicos qu’estorben l’espardimientu de contaminantes (estabilidá atmosférica, inversión térmica y ausencia d’agua).

L’aglomeración del área d’Uviéu incluye, amás d’esti conceyu, los de Noreña, Siero, La Ribera y Llanera, amás de la zona industrial de Morcín.

Les estaciones de la rede de control del Palaciu de los Deportes d’Uviéu y la de Llugones, en Siero, detectaron valores percima de los topes previstos pa l’activación del nivel preventivu en partícules PM 2,5.

Los valores rexistraos nos trés últimos díes son estos:

PM 2,5 (µg/m3)

El Principáu aconseya que les persones sensibles sobre manera (adultos o neños con problemes respiratorios, patoloxíes cardiaques, EPOC, etcétera, muyeres embaranzaes y lactantes) planifiquen l’actividá física y la mengüen si esperimenten síntomes. Tamién ye aconseyable que s’aparten de les víes con más tráficu.

Igualmente, caltiénse en vigor el protocolu d’actuación n’episodios de contaminación del aire na zona oeste de Xixón activáu pol Conceyu, nel so nivel 1, lo qu’implica que se siguen aplicando midíes de calter informativu, de tráficu y pal sector industrial. El protocolu redactóse nel marcu d’un plan d’acción a plazu curtiu pal oeste de Xixón aprobáu pol Gobiernu d’Asturies en marzu del 2021.