Categories Navigation

Categories Navigation

El Principáu caltién activu’l protocolu por contaminación del aire nel área d’Uviéu

21/01/2022
  • La estación de la zona norte de la ciudá rexistra valores altos de partícules en suspensión


La Conseyería d’Alministración Autonómica, Mediu Ambiente y Cambéu Climáticu decidió caltener activu’l quintu día siguíu’l protocolu d’actuación énte episodios de contaminación del aire, nel so nivel preventivu (nivel 0), nel área d’Uviéu, al persistir niveles altos de partícules en suspensión na atmósfera, a pesar de que se prevén pa güei condiciones favorables de ventilación.

El dispositivu actívase nel so nivel 0 cuando la concentración de partícules na atmósfera ye de más de 25 microgramos por metru cúbicu (µg/m3), nel casu de les de diámetru inferior a 2,5 micres (PM 2,5) o de 45 µg/m3 pa les de diámetru inferior a 10 micres (PM 10), a lo llargo de trés díes, en polo menos una estación de la zona y, simultáneamente, existe previsión de fenómenos meteorolóxicos qu’estorben l’espardimientu de contaminantes (estabilidá atmosférica, inversión térmica y ausencia d’agua).

L’aglomeración del área d’Uviéu incluye, amás d’esti conceyu, los de Noreña, Siero, La Ribera y Llanera, amás de la zona industrial de Morcín.

La estación de la rede de control del Palaciu de los Deportes d’Uviéu detectó valores percima de los topes previstos pa l’activación del nivel preventivu en partícules PM 2,5. Sicasí, la concentración de partícules rexistrada na estación de Llugones, en Siero, qu’en díes anteriores xustificó l’activación del protocolu, ta yá perbaxo de los 25 microgramos por metru cúbicu.

Los valores rexistaos nos trés últimos díes nel Palaciu de los Deportes son estos:

PM 2,5 (µg/m3)

 

18/01/2022

19/01/2022

20/01/2022

Palaciu Deportes

34

30

27

​​​​​​​
El Principáu aconseya que les persones sensibles sobre manera (adultos o neños con problemes respiratorios, patoloxíes cardiaques, EPOC, etcétera, muyeres embaranzaes y lactantes) planifiquen l’actividá física y la mengüen si esperimenten síntomes. Tamién ye aconseyable que s’aparten de les víes con más tráficu.

Nel casu de Xixón, anque se caltién en vigor el protocolu d’actuación n’episodios de contaminación del aire na zona oeste de Xixón activáu pol Conceyu, baxa de nivel y pasa al 0 (preventivu), atendiendo a la disminución de los niveles de partícules en suspensión rexistraos. El protocolu redactóse nel marcu d’un plan d’acción a plazu curtiu pal oeste de Xixón aprobáu pol Gobiernu d’Asturies en marzu del 2021.