• La tasa autonómica establezse en 51,5, frente a una media nacional de 40,2
• L’HUCA rexistra'l mayor númberu de donaciones por muerte encefálica de toa España’l segundu añu siguíu 
• El Principáu contabiliza un 5 % de negatives familiares a la donación, la menor a nivel estatal

La tasa de donantes d'órganos n'Asturies establezse en 51,5 por millón d'habitantes nel 2021, percima de los 40,2 de la media nacional. D'esta miente, el Principáu asítiase como la cuarta comunidá en númberu porcentual de donaciones, depués de Cantabria, Navarra y Murcia.

L'añu pasáu, Asturies contabilizó 91 donantes (8 más que nel 2020), de los cualos 45 fueron por muerte encefálica y 7 en situación de asistolia (ausencia total de sístole cardiaca). L'Hospital Universitariu Central d'Asturies (HUCA) foi'l centru sanitariu en que se rexistró'l mayor númberu de donantes en muerte encefálica del país el segundu añu siguíu.

Estos datos facilitolos güei la Organización Nacional de Tresplantes (ONT) y ponen de manifiestu que nel 2021 la donación recuperóse un 7 % y un 8 % los tresplantes, tres la mengua esperimentada nel exerciciu anterior de resultes de la pandemia.

Los equipos del HUCA, centru de referencia rexonal pa esti tipu d'intervenciones, realizaron l'añu pasáu 76 tresplantes renales y implantaron 15 corazones, 30 fégados y 131 córnees. El so llabor cuntó cola collaboración de los profesionales de les UCI y la implicación de los servicios d'urxencies de tolos hospitales asturianos, nel marcu del proyectu de cuidaos intensivos empobinaos a la donación. Esti programa fai posible l'ingresu na UCI de persones con dañu cerebral catastróficu y irreversible pa facilitar la donación, d’alcuerdu colos valores, principios y deseos de caúnu.

Otra manera, Asturies ye, xunto con Madrid, Cantabria y Cataluña, una de les comunidaes con más pacientes tresplantaos gracies al intercambiu d'órganos ente autonomíes.
Desque empezaron estos programes n'Asturies, llográronse más de 1.450 donantes multiorgánicos y lleváronse a cabu más de 1.860 tresplantes renales, 634 hepáticos y 340 cardiacos.

Alta concienciación de la población

Otra manera, el Principáu ye la comunidá que rexistró menos negatives familiares nel 2021, con un 5 %, frente a una media nacional del 17 %. Esta cifra reflexa la concienciación alta de la población asturiana escontra la donación d'órganos, asina como la solidaridá de les families y de los mesmos pacientes, qu'espresaron los sos deseos nes declaraciones de voluntaes antemanaes. Tamién ye una bona muestra de la calidá del sistema sanitariu, dotáu con personal altamente cualificáu.

La Conseyería de Salú recuerda la importancia de la donación d'órganos, yá que cada donante regala un promediu de 30 años de vida y dellos estudios demuestren qu'un donante multiorgánicu (seis órganos) pue dar hasta 55,4 años de vida a distintos receptores.

El Gobiernu d'Asturies reconoz y estima l'arrogancia y solidaridá de tolos donantes y de les families que faen posibles los tresplantes.​​