• La conseyera de Cultura detalla un proyectu pa facer de la comunidá autónoma un referente de rutes de senderismu y cicloturismu, al que se van destinar 2,5 millones 
• Berta Piñán anuncia tamién la potenciación del patrimoniu mineru nes cuenques con un presupuestu de 1,1 millones
• El gobiernu autonómicu va dedicar 830.000 euros a homoxeneizar  y dixitalizar les oficines d'información turística 
• La Feria Internacional reconoz al estand del Principáu como'l meyor na categoría de comunidaes autónomes y instituciones

La conseyera de Cultura, Política Llingüística y Turismu, Berta Piñán, presentó güei en Fitur los trés primeros proyectos que'l Gobiernu d'Asturies va poner en marcha pa complementar los sos planes territoriales de sostenibilidá turística, y que’l so financiamientu ta sofitáu por una parte de los 7,5 millones que'l Principáu xestiona pa desenvolver les denominaes acciones de cohesión ente destinos.

Amás d'estos recursos, l'Executivu va disponer de más fondos: 15,4 millones pa seis planes territoriales estraordinarios y 5,3 millones del plan nacional de sostenibilidá 2021, destinaos al Xacobeo 21-22. Si se suma la recién aprobación de 4,1 millones pa los planes ordinarios de sostenibilidá turística d'Ayer y de la comarca d'Avilés, el Principáu va movilizar nos años próximos un total de 32,3 millones pa la execución de la so estratexa turística.

La conseyera de Turismu anunció mientres la so intervención les primeres acciones de cohesión en destín destinaes a “completar y rellacionar tresversalmente los planes de sostenibilidá, pa xenerar dinámiques de collaboración y asegurar la coordinación y cohesión territorial  na Estratexa de Turismu d'Asturies 20-30”. Piñán concretó estos trés primeros proyectos:

• Plan rexonal de rutes de senderismu y cicloturismu. Con un presupuestu de 2,5 millones, l'oxetivu ye consolidar Asturies como un destín de referencia en senderismu y cicloturismu. Pa ello, el plan va ellaborar un censu de les rutes de senderismu y cicloturismu que va documentar l'estáu de caúna col fin de detectar les faltes y identificar les necesidaes de meyora. Desque s’ellabore’l diagnósticu, va empecipiase la intervención sobre los itinerarios clave identificaos na Estratexa de Turismu d'Asturies  2020-2030: Sienda Costera, Sienda del Osu y Ruta de les Pelegrinaciones. De siguío, va actuase sobre'l restu de los itinerarios, cola mira de dar solución a les necesidaes detectaes na auditoría pa caúnu de los allugaos en territorios que nun desenvuelvan el so propiu plan de sostenibilidá turística.
• Plan de patrimoniu mineru de les cuenques. Esti proyectu, al que se destinen 1,1 millones, ta encontáu en que'l turismu industrial n'Asturies contribuye a reforciar una imaxe d'identidá territorial que redunda directamente na competitividá del destín. El plan contempla una batería d'acciones empobinaes al afitamientu d'un productu que supón una ventaya competitiva p'Asturies:
  • Desenvolvimientu de productu turismu industrial: Como puntu de partida, prevése la ellaboración d'un inventariu de recursos de patrimoniu industrial y mineru que va completase con una evaluación de les sos potencialidaes pa la so puesta en valor al traviés del diseñu de rutes y la interpretación del patrimoniu.
  • Recuperación d'elementos de patrimoniu industrial con potencial pa la so puesta en valor como recursu turísticu y intervenciones de meyora sobre los yá esistentes. Asina mesmo, va procedese a la señalización de dichos recursos cola mira de facilitar al visitante la so identificación y localización nel territoriu. 
  • Desenvolvimientu d'iniciatives de dixitalización de los conteníos espositivos y museísticos de los equipamientos industriales y mineros esistentes, cola mira de potenciar la innovación y diversificación de la ufierta y de los productos y servicios rellacionaos con estos equipamientos.
• Plan de dixitalización de les oficines d'información turística. A esti proyectu van destinase 830.000 euros. Nun primer pasu, va revisase la estructura y el funcionamientu de l'actual rede d'oficines, que al depender de distintes entidaes y alministraciones nun tienen un comportamientu homoxeneu. Darréu, prevése dotales del equipamientu tecnolóxicu necesariu pa convertise en Smart Offices. Asina mesmo, el plan va desenvolver una plataforma dixital que dexe'l trabayu en rede de toles oficines, facilitando la recoyida de datos y l'intercambiu d'información, asina como l'usu de ferramientes dixitales pa dar un meyor serviciu al visitante. Al traviés d'esta inversión búscase la modernización de los servicios d'información y convertir a les oficines n'emisores y receptores d'información sobre l'actividá turística.

Piñán refirióse tamién al apueste pol Xacobéu, prioritariu nel Plan Nacional de Sostenibilidá 2021, y concretó que “ente anguaño y 2024, van invertise 5,3 millones nos Caminos de Santiago asturianos pa facelos más accesibles, más sostenibles, más eficaces enerxéticamente, y más conectaos y dixitalizaos”. 

Na so intervención, la conseyera recordó que'l Gobiernu d'Asturies va disponer de 15,4 millones pa los planes estraordinarios de sostenibilidá en destín de Xixón, Llanes, Teberga, Cangas, la Comarca de la Sidra y la Comarca Oscos-Eo. La cifra supón el 70 % del presupuestu del plan territorial, y los proyectos afecten a 23 conceyos que suponen una tercer parte de la población d'Asturies. De la mesma, na estratexa turística inclúyense los planes ordinarios de sostenibilidá d'Ayer y de la Comarca d'Avilés, aprobaos apocayá pol Gobiernu d'Asturies y que van movilizar 4,1 millones. Estos dos planes súmense a los aprobaos nel 2020 pa Onís y Somiedu.

Asturies, premiu al meyor estand de Fitur

L’estand del Principáu d'Asturies en Fitur foi premiáu tamién nesta edición de la feria. Si nel 2021 l'espaciu asturianu foi reconocíu como'l Meyor Estand Sostenible, anguaño foi gallardonáu como Meyor Estand de Comunidaes Autónomes y Instituciones. El presidente del Gobiernu d'Asturies, Adrián Barbón, manifestó'l so contentu pol reconocimentu: “Ayeri pudi comprobar que’l nuestru estand causaba sensación ente los visitantes, y güei confírmase con esti premiu. Ye una noticia fantástica”.