Categories Navigation

Categories Navigation

Un proyectu pioneru alcordáu ente’l Principáu y el Gobiernu central va permitir la formación dixital de más de 3.000 persones que perciben rentes mínimes

21/01/2022
  • El programa, financiáu con 7,3 millones de fondos europeos y que se va llevar alantre en tolos conceyos d’Asturies, incluye un bonu de mil euros pa equipos portátiles y conexón a internet un añu .
  • El presidente Adrián Barbón y el ministru José Luis Escrivá presentaron güei n’Uviéu esta iniciativa.

Más de 3.000 persones que perciben rentes mínimes (salariu social básicu o ingresu mínimu vital) van recibir formación dixital dientro d’un proyectu pioneru n’España, diseñáu pa menguar la resquiebra tecnolóxica, que cunta con un financiamientu de 7.335.892 euros de fondos europeos. El presidente del Principáu, Adrián Barbón, y el ministru d’Inclusión, Seguridá Social y Migraciones, José Luis Escrivá, presentaron esta mañana n’Uviéu’l conveniu que va dexar poner en marcha esta iniciativa en febreru.

El proyectu pilotu Conect-AS: itinerarios d’inclusión social dixital nel Principáu d’Asturies enmárcase nel Plan de Recuperación, Tresformación y Resiliencia y va desenvolvese en tolos conceyos de la comunidá. Ta concebíu pa impulsar la formación dixital de persones que s’atopen en riesgu de probeza o esclusión social, cola mira d’apurri-yos les ferramientes y el conocimientu necesariu pa que puedan aportar a información n’internet y realizar tamién xestiones telemátiques ordinaries.

Trátase del programa más ambiciosu pa lluchar contra la esclusión social por falta de formación nes tecnoloxíes dixitales que se llevó a cabu hasta agora n’Asturies y contempla cuatro llinies esenciales d’actuación:

  • Itinerariu formativu adaptáu y individualizáu pa facilitar l’adquisición d’habilidaes básiques pa la inclusión dixital.
  • Bonu Conect-AS. Un componente clave del proyectu ye la concesión d’ayudes por valor de mil euros a les persones participantes pa l’adquisición d’un equipu portátil y/o conexón a internet un añu. Tamién se prevén subvenciones que faciliten la conciliación y cubran los gastos de tresporte p’acceder a la formación vinculada a los centros de dinamización tecnolóxica local. Pa la creación d’esta rede, la Conseyería de Derechos Sociales y Bienestar buscó’l sofitu de tolos conceyos asturianos.
  • Ameyorar l’accesibilidá a les principales prestaciones sociales estatales, autonómiques y locales al traviés de medios electrónicos.

La impartición de los itinerarios va correr al cargu d’educadores y integradores sociales. Tamién va participar personal de sofitu escoyío ente les persones beneficiaries del salariu social básicu. Pela so parte, la empresa Tragsatec, perteneciente al grupu Tragsa, va encargase de la formación y d’otros llabores inherentes a la execución del proyectu.

 

Iniciu de la formación en setiembre

El proyectu pilotu va empezar el mes que vien cola selección de participantes, que se va allargar hasta xunu. La previsión ye que los itinerarios formativos empiecen en septiembre en tolos conceyos.

A lo llargo del estáu d’alarma evidenciáronse les dificultaes de la población pa efectuar trámites de forma telemática, non solo por falta d’equipos, sinón tamién pola falta d’habilidaes n’aspectos clave como la identificación dixital, l’usu de dispositivos electrónicos o la comprensión de conceptos básicos pa xestionar solicitúes o presentar documentación en llinia. Esti proyectu quier capacitar a les persones beneficiaries de rentes mínimes y ufierta-yos ferramientes pa encarar estes actuaciones d’una manera eficaz.