Categories Navigation

Categories Navigation

Llangréu va cuntar con un palaciu de xusticia nel segundu semestre del 2023 que va unificar les trés sedes actuales nun edificiu

27/01/2022

​​​​​​​de izquierda a derecha,  la fiscal superior de Asturias, Mª Esther Fernández; el presidente del Tribunal Superior de Justicia de Asturias, Jesús María Chamorro; la consejera de Presidencia, Rita Camblor, y el presidente del Principado de Asturias, Adrián Barbón.

  • El presidente Adrián Barbón participó güei nel allugamientu de la primer piedra del equipamientu, que supera los 6 millones de presupuestu.
  • El Gobiernu d'Asturies va realizar anguaño meyores en xulgaos d'Uviéu, Xixón y Avilés y va empecipiar la rehabilitación del de Cangas.

Llangréu va cuntar nel segundu semestre del 2023 con un palaciu de xusticia nuevu que va unificar les trés sedes actuales nel conceyu nun edificiu únicu. El presidente del Principáu, Adrián Barbón, presidió güei l'actu d'allugamientu de la primer piedra d'esti equipamientu, que les sos obres axudicáronse’l mes pasáu a la empresa Ferrovial Construcción por un importe de 6.198.457 euros.

L’inmueblu nuevu va tener 3.362 metros cuadraos, una superficie que dobla'l tamañu de les actuales dotaciones, y va ser compactu, lluminosu, accesible y eficiente dende'l puntu de vista enerxéticu.

El partíu xudicial de Llangréu, con una estensión de 82,46 quilómetros cuadraos y una población próxima a los 40.000 habitantes, cunta con trés xulgaos de primer instancia y instrucción, otru de lo penal y la sección territorial de Fiscalía.

Los xulgaos de primer instancia y instrucción númberu 1 y 2, asina como la Fiscalía, allúguense nun edificiu de titularidá autonómica na cai Dorado de Sama, con 1.073 metros cuadraos de superficie. El númberu 3 asítiase nun local de la planta baxa de la cai Víctor Felgueroso, a unos 200 metros de los dos anteriores. A lo último, la sede de lo penal ta instalada nuna planta baxa na plaza Nespral. Esta dispersión, mesmo que l'estáu actual de les instalaciones, nun ye apropiada pa la perstación eficaz del serviciu públicu, polo que'l Principáu decidió reagrupales nun edificiu únicu.

El palaciu nuevu va construyise nun recintu de Sama cedíu pol conceyu, ente les cais La Nalona y Capitán Alonso Nart, y va cuntar con cuatro xulgaos de primer instancia y instrucción y penal, amás de sede pa la Fiscalía. Trátase d’un espaciu modular que dexa múltiples disposiciones, ampliaciones y reformes en función de posibles necesidaes futures. La mayor parte de l'actividá pública va desenvolvese na planta baxa, cola mira de garantizar l'accesibilidá.

 

Distribución de los servicios

L'edificiu va tener cuatro pisos. Na planta baxa van habilitase les dependencies del Rexistru Civil, sales de vistes, de reconocencia y una específica pa l'atención a víctimes de violencia sobre la muyer; zones pa testigos, árees de control y de seguridá, celdes pa deteníos, aseos y otres instalaciones.

Nel primer pisu van allugase les oficines de dos xulgaos y la Fiscalía, una zona d'abogaos y los despachos de xueces, fiscales y lletraos. Na segunda planta van instalase la zona d'oficines d'otros dos xulgaos, la clínica forense, el serviciu d'orientación xurídica, un espaciu pa procuradores, despachos y sala multiusos. La tercera va destinase, na so mayor parte, a archivu y instalaciones y va allugar almacenes, vestuarios y instalaciones de telecomunicaciones.

La construcción ta concebida como edificiu de consumu d'enerxía cuasi nulu. Pa ello, va haber un pozu de lluz nun patiu central, que va suministrar illuminación natural. El patiu va quedar cubiertu por un llucernariu acristaláu que pel iviernu va aprovechar l'efectu ivernaderu y va minimizar la demanda de calefacción. Amás, va cuntar con unos estores móviles pa regular el confort térmicu mientres el branu.

El proyectu, financiáu pola Unión Europea dientro del Programa Operativu Feder, va dexar xunir los distintos estamentos xudiciales y amenorgar desplazamientos, tanto de persones como d'espedientes.

La obra del palaciu de xusticia de Llangréu súmase a otres actuaciones empobinaes a la modernización y refuerzu de la rede d'infraestructures xudiciales, como les meyores que se tán realizando nel d'Avilés o les que van empezar d’equí a poco en Xixón pa dotar d’instalaciones nueves al xulgáu de violencia sobre la muyer.

Asina mesmo, el presupuestu del Principáu p'anguaño incluye financiamientu pa sacar a llicitación el proyectu de rehabilitación integral de la sede xudicial de Cangas, que va cuntar con fondos europeos Next Generation pa la rehabilitación enerxética, y pal proyectu y construcción del xulgáu nuevu de Pravia nel antiguu edificiu de l'azucrera. Tamién recueye una partida p'anovar el sistema de climatización y illuminación del palaciu de xusticia d'Uviéu.