• Les estaciones que controlen la zona norte de la ciudá y Llugones detectaron valores altos de concentración de partícules nos últimos trés díes.
• La midida implica’l siguimientu de la evolución, l’impulsu d’acciones informatives empobinaes a la ciudadanía, les empreses y otres alministraciones, y la prohibición de quemes vexetales.

La Conseyería d’Alministración Autonómica, Mediu Ambiente y Cambéu Climáticu activó’l protocolu d’actuación énte episodios de contaminación del aire, nel so nivel preventivu (nivel 0), nel área d’Uviéu, al persistir a lo llargo de trés díes siguíos niveles altos de partícules en suspensión na atmósfera y existir condiciones desfavorables de ventilación.

El dispositivu actívase nel so nivel 0 cuando la concentración de partícules na atmósfera ye de más de 25 microgramos por metru cúbicu (µg/m3), nel casu de les de diámetru inferior a 2,5 micres (PM 2,5) o de 45 µg/m3 pa les de diámetru inferior a 10 micres (PM 10), a lo llargo de trés díes, en polo menos una estación de la zona y, simultáneamente, existe previsión de fenómenos meteorolóxicos qu’estorben l’espardimientu de contaminantes (estabilidá atmosférica, inversión térmica y ausencia d’agua). Según les previsiones de l’Axencia Estatal de Meteoroloxía (Aemet), la ventilación nel área d’Uviéu va ser desfavorable pal día de güei. Polo tanto, danse les condiciones p’activar el protocolu.

L’aglomeración del área d’Uviéu incluye, amás d’esti conceyu, los de Noreña, Siero, La Ribera y Llanera, amás de la zona industrial de Morcín.

Les estaciones de la rede de control del Palaciu de los Deportes d’Uviéu y la de Llugones, en Siero, detectaron valores perriba de los topes previstos pa les partícules PM 2,5 y PM10. En concreto, los valores medios diarios rexistraos neses estaciones nos últimos trés díes foron estos:

PM 2,5

PM 10

Les demás estaciones que monitoricen la calidá del aire n’Asturies nun presenten simultáneamente valores de concentración de partícules en suspensión y condiciones desfavorables de ventilación qu’esixan l’activación del protocolu. El Conceyu de Xixón, pela so parte, tien activáu’l protocolu pa la zona oeste de Xixón nel so nivel 1.

Midíes

El nivel preventivu del protocolu implica’l siguimientu de la evolución y l’adopción de midíes informatives empobinaes a la ciudadanía, les empreses de la zona y otres alministraciones. Anque nesta fase nun s’establecen restricciones de tráficu, sí aconseya l’usu del tresporte públicu y l’usu compartíu del vehículu priváu. Amás, prohíbense les quemes de restos vexetales.

Los conceyos afectaos puen adoptar les midíes que consideren afayadices pa menguar la contaminación, como’l riegu de viales y carreteres. Tamién se va reforzar la inspección ambiental a les empreses del área afectada.

El Principáu aconseya que les persones sensibles sobre manera (adultos o neños con problemes respiratorios, patoloxíes cardiaques, EPOC, etcétera, muyeres embaranzaes y lactantes) planifiquen l’actividá física y la mengüen si esperimenten síntomes. Tamién ye aconseyable que s’aparten de les víes con más tráficu.

Niveles del protocolu

El protocolu de contaminación regula trés contaminantes: partícules PM 2,5, partícules PM 10 y dióxidu de nitróxenu (NON2).

Amás, propón trés niveles: 0 (preventivu), 1 (avisu) y 2 (alerta), a tenor de la superación d’estos topes.

PM10

PM2,5

NO2

La superación d’estos topes tien que dir acompañada, de manera simultánea, de la previsión de fenómenos meteorolóxicos qu’estorben l’espardimientu de contaminantes na atmósfera.