​​​​​​​

• La Viceconseyería d’Infraestructures sacó a llicitación, por 1,1 millones, la meyora d’esta carretera ente Grullos y La Peral.

El Gobiernu d'Asturies acaba de rematar les obres de meyora del encruz ente la carretera AS-237 (Avilés- Grau) y el camín de La Llaguna, nel conceyu d'Illas, nes qu'invirtió 67.730 euros.

La directora xeneral d'Infraestructures Viarias y Portuaries, Esther Díaz, visitó güei la nueva intersección, qu'aumenta la visibilidá. L'actuación consistió na construcción d'un nuevu encruz en forma de ‘T’, que reasitia'l entronque nuna recta a unos 50 metros del anterior. La obra completóse colos trabayos d'escavación, rellenu y asfaltáu, amás de la instalación de bordiellos y señalización.

Coles mesmes, la Conseyería de Mediu Rural y Cohesión Territorial yá sacó a llicitación la meyora de los pocu más de 10 kilómetros del AS-237 que dixebren Grullos (Candamo) de La Peral (Illas), con un presupuestu base de 1,1 millones y un plazu de siete meses.

Nesti tramu, los trabayos van centrar na rehabilitación superficial de la vía ente los puntos quilométricos 6,8 y 17,1. Amás, van rehabilitase aquellos tramos onde se producieron argayos, pa lo que se va crear una nueva escampada, van construyise murios y escolleres y va ameyorase l'actual rede de drenaxe.

El Principáu va dotar la vía de nueva señalización horizontal y vertical y va acometer una nueva regulación de los tramos d'adelantamientu. Tamién va limitar la velocidá nesti tramu a 60 kilómetru per hora.

Pela so parte, el tramu que une La Peral (Illas) con La Cruz d'Illas (Castrillón) atópense en procesu de contratación. La rehabilitación integral de los casi 7 quilómetros del AS-237 cuenta con una partida presupuestaria pa esti exerciciu de 846.333 euros y prevese que salga a llicitación nos próximos meses. Cola meyora de dambos tramos, el Gobiernu d'Asturies va rehabilitar más de 17 kilómetros de los pocu más de 26 colos que cunta la carretera que xune Grau con Avilés.