• La estación del Palaciu de los Deportes y la de Llugones siguen detectando valores altos de partícules en suspensión

La Conseyería d’Alministración Autonómica, Mediu Ambiente y Cambéu Climáticu caltién activu’l segundu día siguíu’l protocolu d’actuación énte episodios de contaminación del aire, nel so nivel preventivu (nivel 0), nel área d’Uviéu, al persistir niveles altos de partícules en suspensión na atmósfera y previsión de condiciones desfavorables de ventilación.

El dispositivu actívase nel so nivel 0 cuando la concentración de partícules na atmósfera ye de más de 25 microgramos por metru cúbicu (µg/m3), nel casu de les de diámetru inferior a 2,5 micres (PM 2,5) o de 45 µg/m3 pa les de diámetru inferior a 10 micres (PM 10), a lo llargo de trés díes, en polo menos una estación de la zona y, simultáneamente, existe previsión de fenómenos meteorolóxicos qu’estorben l’espardimientu de contaminantes (estabilidá atmosférica, inversión térmica y ausencia d’agua).

L’aglomeración del área d’Uviéu incluye, amás d’esti conceyu, los de Noreña, Siero, La Ribera y Llanera, amás de la zona industrial de Morcín.

Anque los niveles de partícules PM10 rexistraron valores perbaxo de los previstos pa l’activación al respective d’ayeri, les estaciones de la rede de control del Palaciu de los Deportes d’Uviéu y la de Llugones, en Siero, siguen detectando concetraciones percima de los topes previstos pa l’activación nel casu de les partícules PM 2,5.

Los valores medios diarios rexistraos en dambes estaciones nos trés díes últimos foron: 

PM 2,5

D’alcuerdu coles previsiones de l'Axencia Estatal de Meteoroloxía (Aemet), la ventilación nel área d’Uviéu va ser favorable güei, pero desfavorable la fin de selmana. Danse, d’esta manera, les condiciones pa caltener activáu'l protocolu.

Les demás estaciones que monitoricen la calidá del aire n’Asturies nun presenten simultáneamente valores de concentración de partícules en suspensión y condiciones desfavorables de ventilación qu’esixan l’activación del protocolu. El Conceyu de Xixón, pela so parte, tien activáu’l protocolu pa la zona oeste nel so nivel 1.

Midíes 

El nivel preventivu del protocolu implica’l siguimientu de la evolución y l’adopción de midíes informatives empobinaes a la ciudadanía, les empreses de la zona y otres alministraciones. Anque nesta fase nun s’establecen restricciones de tráficu, sí aconseya l’usu del tresporte públicu y l’usu compartíu del vehículu priváu. Amás, prohíbense les quemes de restos vexetales.

Los conceyos afectaos puen adoptar les midíes que consideren afayadices pa menguar la contaminación, como’l riegu de viales y carreteres. Tamién se va reforzar la inspección ambiental a les empreses del área afectada.

El Principáu aconseya que les persones sensibles sobre manera (adultos o neños con problemes respiratorios, patoloxíes cardiaques, EPOC, etcétera, muyeres embaranzaes y lactantes) planifiquen l’actividá física y la mengüen si esperimenten síntomes. Tamién ye aconseyable que s’aparten de les víes con más tráficu.